Ofisi Ya Kodi Yaongeza Imani Kwa Walipakodi Nchini

Na Joyce Kasiki,DAR ES SALAAM 

OFISI ya Usuluhishi wa Malalamiko na Taarifa za Kodi imeeleza kuwa inaendelea kuweka mazingira rafiki kwa walipakodi na wawekezaji kwa kushughulikia changamoto za kikodi kwa haraka, hatua inayochochea ulipaji wa kodi kwa hiari na kuimarisha uchumi wa Taifa.

Akizungumza katika Maonesho ya 50 ya Kimataifa ya Biashara ya Dar es Salaam (Sabasaba), Msuluhishi wa Malalamiko na Taarifa za Kodi, Erastus Mtui, alisema maonesho hayo yanatoa nafasi kwa taasisi hiyo kuwafikia wananchi, kuwaelimisha kuhusu huduma zake na kupokea malalamiko pamoja na taarifa zinazohusu kodi.

Alisema ofisi hiyo, ambayo imekuwa ikifanya kazi kwa takribani miaka miwili na nusu, ilianzishwa ili kuwapa walipakodi na wawekezaji sehemu huru ya kuwasilisha changamoto zao za kikodi na kupata suluhisho kwa wakati.

Mtui alisisitiza kuwa ukusanyaji wa kodi ni msingi wa maendeleo ya taifa, hivyo ni muhimu kwa walipakodi kutekeleza wajibu wao kwa hiari huku Serikali ikiendelea kuondoa vikwazo vinavyoweza kuathiri utekelezaji wa wajibu huo.

Alieleza kuwa mchango wa ofisi hiyo unaendana na malengo ya Dira ya Taifa ya Maendeleo 2050, ambayo inalenga kujenga uchumi imara kupitia mazingira bora ya biashara na uwekezaji.

Kwa mujibu wake, wananchi wanaweza kuwasilisha malalamiko yao kwa kutembelea ofisi za taasisi hiyo, kupiga simu za bure, kutumia mfumo wa mtandao au programu ya Suluhu ya Kodi App, huku maandalizi ya huduma ya USSD yakiwa katika hatua za mwisho ili kurahisisha upatikanaji wa huduma kwa watumiaji wa simu za kawaida.

Amesema tangu kuanzishwa kwa ofisi hiyo, jumla ya malalamiko 593 yamepokelewa na kufanyiwa kazi, ambapo malalamiko 340 yalitatuliwa ndani ya mwaka uliopita pekee.

Amewahimiza wananchi wanaotembelea Maonesho ya Sabasaba kufika kwenye banda la Ofisi ya Usuluhishi wa Malalamiko na Taarifa za Kodi ili kujifunza zaidi kuhusu huduma zinazotolewa na namna ya kuwasilisha changamoto za kikodi.

MWISHO

Share:

Read More

SERIKALI KUIMARISHA ELIMU YA MALEZI KUPITIA KAMPASI YA KISANGARA

Na Jackline Minja, Kilimanjaro

Serikali imesema itaendelea kuimarisha malezi ya watoto na utoaji wa mafunzo ya ustawi wa jamii kwa wananchi ili kupunguza changamoto za misongo ya mawazo, migogoro ya kifamilia na matatizo ya kisaikolojia, sambamba na kujenga jamii yenye maadili mema, ustawi imara na uwezo wa kukabiliana na changamoto za maisha ya kila siku.

Akizungumza wakati wa ziara yake katika Taasisi ya Ustawi wa Jamii Kampasi ya Kisangara wilayani Mwanga mkoani Kilimanjaro, Naibu Waziri wa Maendeleo ya Jamii, Jinsia, Wanawake na Makundi Maalum, Mhe. Mhandisi Maryprisca Mahundi amesema Serikali inatambua umuhimu wa taasisi hiyo katika kutoa wataalamu na elimu kwa jamii kuhusu malezi, makuzi na maendeleo ya watoto pamoja na ustawi wa familia. Amesema hali hiyo inachangia kujenga jamii yenye utulivu na maendeleo endelevu.

“Serikali inaendelea kuweka mkazo katika eneo la malezi ya watoto na utoaji wa elimu ya ustawi wa jamii kwa wananchi kwa sababu tunaamini kuwa familia imara ndiyo msingi wa jamii imara. Kupitia mafunzo haya tunalenga kupunguza misongo ya mawazo, kuimarisha afya ya akili na kuhakikisha watoto wanalelewa katika mazingira salama na yenye maadili mema.” alisema Mahundi.

Aidha, amesema Wizara itaendelea kushirikiana na Taasisi hiyo pamoja na wadau wengine kuhakikisha elimu hiyo inawafikia wananchi wengi zaidi, kuimarisha uwezo wa wataalamu wa ustawi wa jamii ili watoe huduma bora zinazokidhi mahitaji ya jamii na kusaidia kukabiliana na changamoto zinazojitokeza katika familia na jamii kwa ujumla.

Kwa upande wake, Katibu Tawala Wilaya ya Mwanga Mpapalike Mfaume amepongeza mchango wa Taasisi hiyo katika kutoa elimu na mafunzo kwa wananchi, akisema hatua hiyo imekuwa na manufaa makubwa katika kuimarisha ustawi wa jamii na kusaidia kupunguza changamoto za kijamii katika wilaya hiyo.

“Tutaendelea kuimarisha ushirikiano wetu na Taasisi ya Ustawi wa Jamii Kampasi ya Kisangara ili kuhakikisha wananchi wetu wanaendelea kupata elimu na huduma za ustawi wa jamii, kwa kuwa tunaamini taasisi hii ni nguzo muhimu katika kusaidia kujenga jamii yenye ustawi, maadili mema na maendeleo endelevu,” alisema Mpapalike

Awali, akisoma taarifa ya Taasisi hiyo Meneja wa Taasisi ya Ustawi wa Jamii Kampasi ya Kisangara Dkt. Leah Mwaisango amesema chuo kinaendelea kutoa mafunzo ya ngazi mbalimbali za taaluma ya ustawi wa jamii pamoja na mafunzo maalum kwa jamii, hatua inayolenga kuongeza uelewa wa masuala ya malezi, makuzi ya watoto, ustawi wa familia na huduma za kijamii ili kujenga jamii yenye ustawi na maendeleo.

“Taasisi imeendelea kutekeleza jukumu lake la kutoa mafunzo kwa wanafunzi na jamii kwa ujumla, lengo likiwa ni kuzalisha wataalamu wenye ujuzi na kuwajengea uwezo wananchi ili waweze kukabiliana na changamoto za kijamii, kuimarisha malezi ya watoto na kuchangia maendeleo ya jamii na Taifa kwa ujumla,” alisema Dkt. Leah.

Ziara hiyo ni sehemu ya juhudi za Serikali za kuimarisha taasisi zake na kuhakikisha zinaendelea kutoa mchango mkubwa katika kukuza ustawi wa jamii, malezi bora ya watoto na afya ya akili, ikiwa ni pamoja na kuhakikisha wananchi wanapata elimu na huduma zinazowawezesha kuishi maisha yenye ustawi na tija.

Share:

Read More

Ithibati yatajwa kuimarisha uaminifu wa Sekta ya Habari na Uchumi wa Vyombo vya Utangazaji

Na Mwandishi Wetu

Bodi ya Ithibati ya Waandishi wa Habari (JAB) imesema utekelezaji wa mfumo wa ithibati kwa waandishi na watangazaji wa habari nchini ni hatua ya kimkakati ya kuimarisha uaminifu, weledi na ushindani wa sekta ya habari katika uchumi wa kisasa unaotegemea taarifa sahihi na zenye kuaminika.

Akizungumza katika Mkutano Mkuu wa Mwaka wa Vyombo vya Utangazaji (ABC) uliofanyika Februari 13, 2026 jijini Dodoma, Kaimu Mkurugenzi Mkuu wa JAB, Wakili Patrick Kipangula, amesema ithibati inalenga kujenga taaluma yenye misingi imara ya kitaaluma, maadili na uwajibikaji kwa mujibu wa Sheria ya Huduma za Habari, Sura ya 229.

Kwa mujibu wa Wakili Kipangula, ithibati si chombo cha kudhibiti maudhui, bali ni utaratibu wa kuweka viwango vinavyolinda hadhi ya taaluma na kuimarisha imani ya umma kwa vyombo vya habari na kwamba katika mazingira ya sasa ya ushindani wa kidijitali, uaminifu wa chanzo cha habari ndiyo mtaji mkubwa wa chombo husika.

Ameongeza kuwa vyombo vya utangazaji vinavyowekeza katika weledi wa rasilimali watu wake vinajiweka katika nafasi bora ya kuvutia wawekezaji, matangazo na ushirikiano wa kimataifa, kwa kuwa soko la habari linazidi kuthamini ubora na uwajibikaji.

Kwa upande wa wadau wa mkutano huo ulioandaliwa na Mamlaka ya Mawasiliano Tanzania (TCRA), imeelezwa kuwa ushirikiano kati ya msimamizi wa maudhui na wadau wa tasnia ni nguzo muhimu katika kujenga sekta imara, inayochochea maendeleo ya kiuchumi na kijamii.

Hatua ya kuimarisha ithibati inaonekana kuwa sehemu ya mkakati mpana wa Serikali wa kukuza taaluma za ubunifu na mawasiliano kwa viwango vinavyokidhi mahitaji ya kitaifa na kimataifa, huku ikihakikisha kuwa sekta ya habari inabaki kuwa mhimili wa uwazi, uwajibikaji na maendeleo endelevu.

Waandishi zaidi ya 3,200 kati ya 3,900 walioomba vitambulisho vya uandishi wa habari (Press Card) wamethibitishwa baada ya kukidhi vigezo vya kisheria, hali inayoonesha mwitikio chanya wa wadau na utayari wa sekta kujiimarisha kitaaluma.

Share:

Read More

Dkt.Mwigulu aiagiza wizara ya Nishati kuongeza kasi usambazaji gesi asilia

Na Mwandishi wetu,Dar

 

WAZIRI MKUU, Dkt. Mwigulu Nchemba ameiagiza Wizara ya Nishati kuongeza kasi ya kupanua mtandao wa usambazaji wa gesi asilia ili kukidhi mahitaji ya Taifa.

Amesema kwa kufanya hivyo kutawawezesha wananchi kupata nafuu ya gharama katika uendeshaji wa vyombo vya moto na matumizi mengine ya nishati pamoja na Serikali kupunguza matumizi ya fedha za kigeni kuagiza mafuta.

Amesema hayo leo Februari 09, 2026 alipozindua kituo Mama cha Gesi Asilia Iliyosindikwa (CNG) cha Puma Energies kilichopo Salasala jijini Dar es Salaam. Ujenzi wa kituo hicho umegarimu takriban shilingi bilioni 13.

“Wizara ya Nishati pia endeleeni kuongeza kasi ya utafutaji wa gesi asilia ili iwe nishati ya kawaida ya maisha ya kila siku ya Mtanzania, Watanzania wote jitokezeni kwa wingi kutumia fursa ya uwepo wa gesi asilia iliyoshindiliwa”.

Mheshimiwa Dkt. Mwigulu amesema kuwa uzinduzi wa mradi huo unaakisi utekelezaji wa Sera ya Taifa ya Nishati na Dira ya Taifa ya Maendeleo 2050. “Vilevile, inaendana na mwelekeo wa Serikali ya Awamu ya Sita chini ya uongozi wa Mheshimiwa Dkt. Samia Suluhu Hassan wa  kuhakikisha rasilimali za nishati, hususan gesi asilia zinatumika kama kichocheo cha maendeleo ya viwanda, usafiri na uzalishaji wa umeme”.

Amesema mradi huo unaashiria hatua muhimu katika utekelezaji wa mkakati wa Taifa wa kuhamia kwenye matumizi ya nishati safi, salama, nafuu na ya uhakika kwa ajili ya maendeleo ya kiuchumi na kijamii. "Kwa kufanya haya Puma Energies mmeunga mkono kwa vitendo jitihada za Mheshimiwa Rais Dkt. Samia Suluhu Hassan za kuijenga Tanzania inayotumia nishati safi.”

Kadhalika Mheshimiwa Dkt. Mwigulu amesema kuwa Serikali itaendelea kuchukua hatua za kuboresha mazingira ya uwekezaji ikiwemo kuhakikisha uwepo wa sera thabiti, mifumo rafiki ya udhibiti, uwazi katika utoaji wa maamuzi na ushirikiano wa karibu kati ya taasisi za Serikali na sekta binafsi.

“Serikali inathamini sana mchango wa Sekta Binafsi katika kutekeleza Miradi ya Maendeleo na utoaji wa huduma kwa umma, Serikali imeendelea kushirikiana na sekta binafsi katika ujenzi wa vituo vya gesi asilia iliyoshindiliwa”.

Waziri Mkuu amesema kuwa katika kipindi cha siku 100 za Rais Dkt. Samia madarakani, Serikali imewezesha upatikanaji wa majiko banifu 13,575 yenye ruzuku ya asilimia 85 na Mitungi ya LPG 28,653 ya kilo sita (6) yenye ruzuku ya asilimia 50. “Vilevile, Serikali imewezesha Taasisi 89 zinazolisha watu zaidi ya 100 kwa siku kuhamia katika matumizi ya nishati safi ya kupikia na hivyo kufikia jumla ya taasisi 1,136.”

Naye Naibu Waziri Wizara ya Nishati, Salome Makamba amesema kuwa moja ya maeneo yanayokua kwa kasi katika matumizi ya gesi asilia ni sekta ya usafirishaji kupitia matumizi ya Gesi Asilia Iliyoshindiliwa (CNG), ambapo kwa sasa zaidi ya vyombo vya moto 15,000 nchini vinatumia CNG.

Amesema kuwa hadi kufikia Januari 2026, vituo vya kujazia CNG vilikuwa 11 ambapo 9 viko katika Jiji la Dar es Salaam, kimoja kipo Mkoa wa Pwani na kingine kipo Mtwara.

“Serikali kwa kushirikiana na sekta binafsi tumeweka mpango wa kuongeza idadi ya vituo kufikia 20 ifikapo Juni, 2026 hususani katikamikoa ya Morogoro na Dodoma, ili kuhakikisha upatikanaji wa huduma za CNG katika miji mikubwa na kwenye barabara kuu za usafirishaji”

Share:

Read More

Makamu wa Rais azindua Moangi wa Ushirikiano kati ya Taasisi za elimu na viwanda

1. 

Na Mwandishi wetu ,Dar

Makamu wa Rais wa Jamhuri ya Muungano wa Tanzania Mhe.Balozi Dkt. Emmanuel Nchimbi ametoa wito kwa sekta binafsi kushirikiana na Vyuo, kuwekeza katika tafiti hususan za sayansi na teknolojia ili kuinua viwango vya tafiti na ubora wa elimu nchini.

 

Makamu wa Rais amesema hayo wakati wa uzinduzi wa mpango wa ushirikiano kati ya Taasisi za Elimu na Waajiri, uliyofanyika katika Kituo cha Mikutano cha Kimataifa cha Julius Nyerere (JNICC) Jijini Dar es Salaam. Amesema Kupitia Mpango huo, sekta binafsi inaweza kuchangia maendeleo ya elimu kwa kufadhili tafiti na kutoa ufadhili kwa wanafunzi wa fani mbalimbali kulingana na mahitaji ya soko la ajira.

 

Aidha, Makamu wa Rais ametoa wito kwa Taasisi za elimu na Sekta binafsi nchini kuzingatia maendeleo ya kasi ya sayansi na teknolojia duniani katika utekelezaji wa Mpango huo. Amesema Vyuo na Sekta binafsi vishirikiane kubaini ujuzi muhimu unaohitajika sasa na siku zijazo hususan katika fani za sayansi, teknolojia, ubunifu, tiba, uhandisi na hesabu ili kuwezesha vijana kushindana na kupata nafasi katika soko la ajira  nchini na kimataifa.

 

Makamu wa Rais amesema ushirikiano baina ya Taasisi za elimu na Viwanda ni hitaji la lazima katika dunia ya leo, kwa kuwa Vyuo haviwezi tena kuwa visiwa vya nadharia, na viwanda haviwezi kukua bila nguvukazi yenye ujuzi unaoendana na teknolojia na ushindani wa soko.

Ameongeza kwamba, Serikali ya Awamu ya Sita imeweka kipaumbele cha kimkakati katika kukuza ujuzi, stadi, maarifa na sifa za kuajirika au kujiajiri miongoni mwa vijana na wahitimu wa ngazi mbalimbali za elimu, ikitambua kwamba maendeleo endelevu ya Taifa hayawezekani bila kuwa na rasilimaliwatu iliyoelimika na yenye uwezo wa kuchangia kikamilifu katika uchumi wa Taifa.

Amesema Serikali imeendelea kufanya maboresho makubwa ya sera na mitaala ya elimu katika ngazi zote kwa lengo la kuujenga mfumo wa elimu ulio mnyumbufu, jumuishi na unaoendana na vipaji, mwelekeo na mahitaji halisi ya soko la ajira, huku ikizingatia mabadiliko ya teknolojia na ushindani wa kitaifa na kimataifa.

Uzinduzi wa Mpango huo ni utekelezaji wa ahadi ya Mheshimiwa Rais Dkt. Samia Suluhu Hassan aliyoitoa wakati wa kampeni za Uchaguzi Mkuu wa mwaka 2025, ambapo aliahidi kuanzisha Mpango wa pamoja kati ya Waajiri, Vyuo vya ufundi stadi na Vyuo Vikuu kwa lengo la kulinganisha mafunzo na mahitaji halisi ya sekta za kipaumbele za Taifa, ndani ya siku 100 baada ya kuapishwa kwake.

Pamoja na mambo mengine, Mpango wa ushirikiano kati ya Taasisi za Elimu na Viwanda unalenga kuimarisha uhusiano wa kimkakati kati ya utoaji wa elimu na utendaji kazi, kwa lengo la kulinganisha mafunzo na mahitaji ya sekta za kipaumbele kama nishati, Teknolojia ya Habari na Mawasiliano (TEHAMA) na viwanda vya kuongeza thamani. 

Aidha, Mpango unaweka msingi thabiti wa kujenga kizazi cha wahitimu wenye uwezo wa kuajirika, kujiajiri na kushiriki kikamilifu katika maendeleo ya Taifa kwani umedhamiria kubadilisha mfumo wa elimu ya nadharia kwenda mfumo unaozingatia ujuzi, vitendo, ubunifu na uzalishaji mali.

Uzinduzi huo, umehudhuriwa na Viongozi mbalimbali wa Serikali, Bunge, Dini pamoja na wadau wa maendeleo. Wengine waliohudhuria ni pamoja na Waajiri na Wamiliki wa Viwanda, Wakuu wa Taasisi mbalimbali, Wakuu wa Vyuo pamoja na Wanafunzi.

 

Share:

Read More

MENEJIMENTI YA TMDA YAJIPANGA NA DIRA 2050

Na Mwandishi wetu

Menejimenti ya TMDA yakutana Morogoro  Februari 3-4, 2026 kujadili rasimu ya Mpango Mkakati Mpya wa Mamlaka wa miaka mitano, 2026/27-2030/31 unaoakisi utekelezaji wa Dira ya Taifa ya 2050. 

Rasimu ya Mpango Mkakati huo ni ya Sita kufuatia kukamilika kwa ufanisi kwa Mpango Mkakati wa Tano. Mpango Mkakati wa Sita wa TMDA unatarajiwa kuanza kutumika mnamo tarehe 01, Julai, 2026.

Pamoja na mambo mengine, rasimu ya Mpango Mkakati husika inalenga katika kuhakikisha ubora, usalama na ufanisi wa bidhaa za dawa, vifaa tiba na vitendanishi kwa lengo la kulinda afya ya Jamii. 

Mkurugenzi Mkuu wa TMDA, Dkt. Adam Fimbo, aliwaeleza wajumbe wa kikao husika kuwa rasimu husika ya Mpango Mkakati inabeba Dira mpya ya TMDA ambayo ni "Kuimarika kwa afya na ustawi wa Watanzania wote kupitia udhibiti bora unaokidhi viwango vya kitaifa". 

Dkt. Fimbo aliongeza kuwa,  Dhamira Mpya ya Taasisi itakuwa " Kulinda  Afya ya Jamii kwa kuhakikisha, usalama, ubora na ufanisi wa dawa, vifaa tiba, vitendanishi na bidhaa zote zinazohusiana na afya".

Uongozi wa TMDA imekuwa na utamaduni shirikishi katika kujadili mambo makubwa yahusuyo taasisi, ambapo watumishi wote hushirikishwa kupitia ngazi mbalimbali ndani ya Mamlaka kabla ya kuidhinishwa na Bodi ya Ushauri ya Wizara kwa TMDA (MAB).

Pamoja na mambo mengine, Mpango Mkakati huu mpya unaweka mwelekeo wa pamoja katika udhibiti, utasaidia katika kupanga matumizi ya rasilimali vizuri na kuboresha uwajibikaji na uwazi.

Mpango Mkakati wa TMDA ni nyaraka muhimu ambayo inaonesha ramani ya safari ya taasisi na ndiyo chombo muhimu cha kuongoza maamuzi na maendeleo ya TMDA.

Share:

Read More

Baraza la sita la wafanyakazi lachagiza mafanikio ya TMDA

Na Mwandishi wetu,Morogoro

Mkurugenzi Mkuu wa Mamlaka ya  Dawa na Vifaa Tiba (TMDA) , Dkt. Adam Fimbo, ametoa pongezi kwa wajumbe wa Baraza la Sita la Wafanyakazi wa TMD kufuatia muda wake wa kuhudumu kufikia kikomo. 

Akizungumza wakati wa ufunguzi wa Kikao cha mwisho cha Baraza hilo la Wafanyakazi lililofanyika  5 Februari, 2026 mkoani Morogoro, Dkt. Fimbo amesema kuwa Baraza la Sita la wafanyakazi ambalo limedumu kwa miaka mitano  limekuwa na mchango mkubwa katika mafanikio ya TMDA katika kipindi hiki ambayo yametokana na mahusiano mazuri baina ya uongozi na wafanyakazi kupitia ushirikishwaji wa wafanyakazi kwenye maamuzi makubwa yenye kuleta tija kwa taasisi kupitia vikao mbalimbali vya baraza.

Dkt . Fimbo amesema, katika kipindi cha baraza hili, mafanikio makubwa ya yaliyopatikana ndani ya TMDA ni pamoja na;  kukamilika kwa jengo la ofisi ya TMDA Makao Makuu, Dodoma, kukamilika kwa nyumba za taasisi katika vituo vya mipaka vya Namanga na Tarakea na Ujenzi wa Tanuru la kuteketeza bidhaa duni na bandia kwa lengo la kulinda Afya ya Jamii. 

Aidha, Dkt. Fimbo ameongeza kuwa mafanikio mengine ambayo Baraza hili linalomaliza muda wake  limehusika nayo ni pamoja na TMDA kufikia ngazi ya 3 ya ukomavu ya WHO (WHO ML3) na kuiweka Tanzania kuwa nchi ya kwanza barani Afrika kufikia hadhi hiyo; Maabara kutambuliwa na WHO kuwa miongoni mwa Maabara bora duniani. Aidha, TMDA imeteuliwa na WHO kuwa Kituo cha Umahiri cha udhibiti wa  dawa, chanjo na utoaji mafunzo ya kiudhibiti barani Afrika.

Pia, Baraza hili la Sita limekuwa na mchango katika kuhakikisha TMDA inaweka mazingira mazuri ya uanzishaji na uendelezaji wa viwanda vya dawa za binadamu 19, dawa za mifugo 2 na vifaa tiba 41 nchini, amesema Dkt. Fimbo

Naye mwakilishi wa Ofisi ya TUGHE Makao Makuu, Wkl. Mwanaidi Mgowa amepongeza uongozi wa TMDA kwa kuwa na Baraza la Wafanyakazi la mfano wa kuigwa na Mabaraza mengine. Aidha, Wkl. Mgowa ametoa wito kwa wajumbe wa TUGHE kujitokeza kwa wingi kushiriki katika uchaguzi ngazi ya Mkoa na Taifa utakaofanyika ndani ya mwaka 2026.

Akitoa salamu za Kamishna wa kazi, Ofisi ya Waziri Mkuu Kazi, Ajira na Mahusiano, Bw. Peter Sembuyagi ameupongeza uongozi wa TMDA kwa kufikia mafanikio makubwa ambayo yamepatikana kupitia dhana ya ushirikishaji ambalo ni takwa la kisheria mahala pa kazi.

Baraza la Wafanyakazi la TMDA hudumu kwa kipindi cha miaka mitano na linaundwa na Menejimenti, wajumbe wa TUGHE na wawakilishi kutoka katika ofisi zote za Kanda ambapo hukutana mara mbili kwa mwaka kwa lengo la kujadili masuala makubwa ya kitaasisi ikiwa ni njia moja wapo ya ushirikishaji wa watumishi katika ngazi ya maamuzi.

Share:

Read More