Serikali yafungia shule ya chalinze modern islamic kuwa kituo cha mitihani

Waziri wa Elimu,Sayansi na Teknlojia

Serikali yafungia shule ya chalinze modern islamic kuwa kituo cha mitihani

                          

Na WyEST,Dar Es Salaam

 

Serikali imeifungia Shule ya Awali na Msingi Chalinze Morden Islamic kuwa kituo cha Mitihani kutokana na udanganyifu uliofanyika katika Mtihani wa darasa la Saba uliofanyika Oktoba 5 na 6, 2022.

 

Hatua hiyo imefikiwa baada ya kufanyika uchunguzi kufuatia taarifa zilizotolewa na Mwanafunzi Iptisam Suleiman Slim wa kituo cha Mtihani wa shule ya Awali na Msingi Chalinze Morden Islamic akieleza kwamba alibadilishiwa namba yake ya mtihani  wakati akifanya mtihani wa somo la mwisho.

 

Akizungumza Jijini Dar es salaam Waziri wa Elimu, Sayansi na Teknolojia Prof Adolf Mkenda amesema uchunguzi uliofanywa na Kamati ya mitihani ya Mkoa wa Pwani  na ule wa  wataalamu wa miandiko  " Forensic"  uliofanywa na Jeshi la polisi umebaini  ufanano wa miandiko kwa watahiniwa 7 wa shule hiyo .

 

Waziri Mkenda amesema kwa kuwa kulikuwa na uzembe uliofanyika pamoja na kuifungia shule hiyo watumishi wa Serikali ambao walikuwa wasimamizi wa kituo hicho watachukuliwa hatua za kinidhamu  huku akimuagiza Mmiliki wa shule ya Awali na Msingi ya Chalinze Morden Islamic kuwafukuza kazi walimu wote waliohusika katika udanganyifu huo. 

 

 “Kwa kuwa Shule hii ni ya binafsi tunaifungia kuwa kituo cha mitihani na haitaruhusiwa kufanyia tena mitihani, lakini pia mwenye shule hakikisha unawafukuza kazi mara moja waalimu waliohusika  na kama hilo halitafanyika  nakuagiza  Kamishna wa Elimu  futa usajili wa shule hiyo na kuifunga  mara moja,”amesema Waziri Mkenda

 

Aidha kufuatia changamoto hiyo Baraza la Mitihani la Tanzania (NECTA) limefanya marekebisho ya namba za Mtihani za watahiniwa husika ili kila mtahiniwa aweze kupata matokeo yake halali.

 

“Nakupongeza Mwanafunzi Iptisam wa kuwa na ujasiri wa kutoa taarifa, tayari NECTA imefanya marekebisho hata kwa wengine ambao wamefanyiwa udanganyifu kama huo. Natoa wito kwa wananchi na wanafunzi wote ukiona mtu anafanya mchezo kwenye mitihani toa taarifa na serikali itachukua hatua mara moja,”amesema Prof. Mkenda 

 

Kwa upande wake Mzazi wa Mwanafunzi Iptisam, Suleiman Said ameishukuru Serikali kwa kufanyia kazi changamoto hiyo  aliyoipata mtoto wake wakati wa kufanya mitihani yake ya kuhitimu darasa la Saba. Pia amevishukuru Vyombo vya Habari kwa kutoa taarifa hiyo na kuweza kuwafikia walengwa na kuifanyia kazi.

Share:

Read More

Dkt.Stergomena ashiriki mkutano wa Tume ya kudumu ya Pamoja baina ya Tanzania na Msumbiji

WAZIRI wa Ulinzi Dkt.Stergomena Tax akizungumza kwenye Mkutano wa Tume ya Pamoja baina ya Tanzania na Msumbiji.

  

 NA MWANDISHI WETU

WAZIRI  wa Ulinzi na Jeshi la Kujenga Taifa Dkt. Stergomena  Tax  ameshiriki Mkutano wa Nne wa Tume ya Kudumu ya Pamoja ya Ushirikiano katika msuala ya Ulinzi na Usalama (JPCDS) baina ya Tanzania na Msumbiji uliofanyika katika Ukumbi wa Joachim Chisano, Maputo nchini Msumbiji. 

Waziri Tax ni Mwenyekiti Mwenza wa Waziri wa Ulinzi wa Msumbiji Cristovao Chume.

Mkutano huo unafanyika kwa mara ya nne sasa ambapo  Mkutano wa kwanza ulifanyika hapa nchini mkoani Dar es Salaam, Februari  04 - 06 Februari, 2011 ambapo Tume hiyo ilianzishwa rasmi.  

Mkutano huo umefanyika kwa ngazi tatu, ambapo ulianza kwa kutanguliwa na ngazi ya wataalamu , ukifuatiwa na kikao ngazi ya Makatibu Wakuu na kuhitimishwa na Mkutano wa mawairi wenye dhamana ya  masuala ya ulinzi na Usalama wa mataifa haya mawili.

Pamoja na mambo mengine vikao vya ngazi zote vilijadili ushirikiano kuhusu masuala ya kiulinzi,  na hatimaye kutoa fursa kwa  Mawaziri hawa wawili, kusaini mikataba  itakayowezesha  kutekelezwa kwa Hati ya Makubaliano  kuhusu ushirikiano kupitia sekta ya Ulinzi na usalama, uliosainiwa kwa pamoja   21 Septemba, 2022 na Mawaziri wa pande zote mbili.

Utiaji saini huo, ulishuhudiwa na Rais wa Jamhuri ya Muungano wa Tanzania, Mheshimiwa Samia Suluhu Hassan na mwenzake Rais wa Msumbiji, Mheshimiwa Filipe Jacinto Nyusi, wakati wa ziara ya kikazi ya siku tatu, aliyoifanya Rais Samia nchini Msumbiji hivi karibuni.

Mbali na  Dkt. Stergomena, ujumbe wa Tanzania ulimjumuisha pia Waziri wa Ardhi, Nyumba na Maendeleo ya Makazi, Mheshimiwa Angelina Sylvester Lubala Mabula, Katibu Mkuu wa Wizara ya Ulinzi na Jeshi la Kujenga Taifa, Dkt. Faraji Kasidi Mnyepe, viongozi wandamizi wakuu kutoka vyombo vya ulinzi na usalama kutoka mataifa yote mawili

Share:

Read More

Miongozo ya uanzishaji na uendeshaji mabaraza ya watoto uwafikie watendaji wa mitaa na vitongoji

Waziri wa Maendeleo ya Jamii,Jinsia,Wanawake na Makundi Maalum Dkt.Dorothy Gwajima akiagana na wanafunzi jijini Dodoma

Na WMJJWM, Dodoma

Waziri wa Maendeleo ya Jamii, Jinsia, Wanawake na Makundi Maalum  Dkt.Dorothy Gwajima amewaagiza Maafisa Maendeleo ya Jamii na Maafisa Ustawi wa Jamii kuhakikisha Miongozo ya Uanzishaji na Uendeshaji wa Mabaraza ya Watoto na Madawati ya Ulinzi kwa Watoto yanawafikia watendaji wote hadi ngazi ya Mtaa na Kijiji.

Dkt. Gwajima ametoa agizo hilo alipotembelea na kuzungumza na wanafunzi wa Shule ya Msingi Makulu na Shule ya Sekondari Sechelela katika Kata ya Dodoma Makulu, Jijini Dodoma Oktoba 30, 2022 kwa lengo la kukagua utekelezaji wa uanzishaji na Uendeshaji wa Mabaraza ya Watoto na Madawati ya Ulinzi wa Watoto Shuleni. 

Amesema miongozo na nyaraka ambazo kila mwananchi hususani watendaji wanatakiwa kuielewa ili kurahisisha utendaji, hivyo hazitakiwi kufungiwa ofisini.

"Hii ni nyaraka ya wazi, kila mtu anatakiwa aisome, kuanzia Mwenyekiti wa mtaa, kijiji hizi hazitakiwi kufungiwa kabatini" amesema Dkt.Gwajima

Ametumia wasaa huo pia kuzungumza na wanafunzi wa shule hizo na kuwataka kuyatumia vema mabaraza ya watoto ili kujilinda dhidi ya ukatili mahali popote.

Dkt.Gwajima ameongeza pia kwamba, Serikali inafanya jitihada nyingi kutokomeza ukatili dhidi ya watoto ikiwemo kuanzisha mabaraza ya watoto na madawati ya ulinzi yawasaidie kujadili changamoto wanazokutana nazo na kutoa taarifa za viashiria vya ukatili panapostahili.

Kwa upande wao wanafunzi wa shule hizo wamemshukuru Waziri Gwajima Kwa juhudi zake za kukabiliana na vitendo vya ukatili na kuwa mabaraza na madawati ya ulinzi yamewasaidia kupunguza changamoto nyingi hasa mimba za utotoni.

"Katika shule yetu Dawati limetusaidia hasa watoto wa kike kwani kabla ya Dawati walikosa mahali pa kusemea shida zao" amesema Irene Boniphace

 Naye mwalimu Mkuu wa shule ya Sekondari Sechelela Grace Shiri amesema madawati ya watoto shuleni yamewasaidia hata walimu na wanafunzi katika shule hiyo.

"Dawati la wanafunzi limewasaidia kujitambua na kuweza kusema shida zao pale wanapopata ukatili ndani na nje ya shule, kujua majukumu yao na walimu yametusaidia kujua kwa haraka matatizo yao, wamekuwa wazi na wanaongozana wenyewe" amesema Shiri

 

Share:

Read More