Jafo aweka hadharani mafanikio ya Muungano wa Tanganyika na Zanzibar

  Na  Joyce Kasiki ,Dodoma

WAZIRI wa Nchi,Ofisi ya Makamu wa Rais ,Muungano na Mazingira Dkt.Selemani Jafo ameeelezea mafanikio lukuki ya miaka 60 ya Jamhuri ya Muungano  wa Tanzania huku akisema mafanikio hayo yamejidhihirisha katika awamu zote za uongozi.

Aidha amesema tangu kuanzishwa kwa utaratibu wa vikao vya pamoja mwaka 2006 hadi sasa, kasi ya utatuzi wa changamoto imeongezeka ambapo hoja 22 za Muungano  zimepatiwa ufumbuzi kati ya hoja 25 zilizoibuliwa.

Alisema changamoto nyingi ambazo zilikuwa hazijapatiwa ufumbuzi zimejadiliwa na pande zote mbili za Muungano na kupatiwa ufumbuzi ambapo katika kipindi cha mwaka 2021 hadi 2024 pekee hoja 15 zimepatiwa ufumbuzi kati ya hoja 18 zilizokuwepo kwa kipindi hicho huku akisema hoja zilizobakia zipo katika hatua mbalimbali za kupatiwa ufumbuzi.

Akizungumza na waandishi wa habari kuhusu mafanikio hayo Dkt.Jafo alisema ,Mafanikio hayo yamejidhihirisha katika kuboresha hali ya nchi kisiasa, kiuchumi na kijamii na kwamba   Muungano umeendelea kudumishwa na hifadhi ya mazingira nchini imeimarika.

Mafanikio ya Kisiasa

Alisema Muungano huo  umedumu kutokana na utashi wa dhati wa kisiasa hapa nchini  waliokuwa nao Waasisi wa Muungano ambao uliwezesha vyama vya siasa vya TANU na ASP kuungana na baadaye kuunda Chama cha Mapinduzi (CCM)  Februari 5, 1977.

Alisema kuunganishwa kwa vyama hivyo kuliongeza ari ya umoja na ushirikiano baina ya watu wa Tanganyika na Zanzibar huku akisema , Muungano wa vyama hivyo umekuwa ni nguzo muhimu katika kujenga mfumo wa kuwa na vyama vya siasa vya kitaifa na hivyo kukuza demokrasia, uhuru wa kutoa maoni na uwazi  katika uendeshaji wa shughuli za kisiasa.

Mafanikio ya Kijamii

Alisema mafanikio hayo hasa katika eneo la ulinzi na usalama ,Serikali zote mbili zimefanikiwa kusimamia utekelezaji wa masuala yaMuungano kwa ufanisi mkubwa ikijumuisha kuimarika kwa utaifa, umoja, amani, utulivu na hali ya maisha ya wananchi kutokana na ukuaji wa uchumi wa pande zote mbili za Muungano.

Huduma za Kijamii 

Kuhusu huduma za kijamii Dkt.Jafo alisema katika kipindi cha miaka 60 ya Muungano  mafanikio makubwa yamepatikana katika huduma za kijamii kama vile elimu, afya, maji, barabara, umeme, utoshelezi wa chakula pamoja na ustawi wa jamii kwa

ujumla.

“Kwa upande wa huduma za elimu, Shule za Msingi zimeongezeka kutoka shule 3,270 mwaka 1961 hadi shule 20,562 mwaka 2024. Kati ya hizo, shule za Serikali ni 18,012 na za binafsi ni shule 2,550. Shule za Sekondari nazo zimeongezeka kutoka shule 41 mwaka 1961 hadi shule 6,511 mwaka 2024,kati ya hizo, shule 4,892 ni za Serikali na 1,619 ni za binafsi.

Huduma za Afya

Huduma za afya zimeendelea kuimarika kutokana na uwekezaji mkubwa uliofanywa na Serikali katika kipindi chote cha Muungano  kutokana na uwekezaji huo, vituo vya kutolea huduma za afya ngazi zote vimeongezeka kutoka vituo 1,343 mwaka 1960 hadi vituo 9,662 mwaka 2024,kati ya vituo hivyo, Zahanati ni 8,043, Vituo vya Afya 1,176,  Hospitali za Halmashauri 171, Hospitali zenye hadhi ya Wilaya 182, Hospitali za Rufaa za Mikoa 28; Hospitali zenye hadhi ya Mkoa 34; Hospitali za Rufaa za Kanda 5; Hospitali zenye hadhi ya Kanda 11; Hospitali maalumu 6; Hospitali ya Taifa 1; na Hospitali Maalumu za Taifa 6.

Aidha alitaja mafanikio mengine yaliyopatikana katika kipindi cha miaka 60 ya Muungano kuwa ni  kuimarika kwa upatikana wa huduma za maji, umeme na mtandao wa barabara.

Alisema upatikanaji wa maji vijijini umeongezeka kutoka asilimia 32 mwaka 2000 hadi asilimia 77 mwaka 2022. Aidha, upatikanaji wa umeme umeongezeka kutoka asilimia 10 mwaka 2000 hadi 78 mwaka 2022.

Vile vile, mtandao wa barabara za lami na zege mijini na vijijini umeongezeka kutoka Kilomita  1,360 mwaka 1961 hadi Kilomita  11,966 mwaka 2022.

Mafanikio ya Kiuchumi

Tangu kuasisiwa kwa Muungano wa Tanganyika na Zanzibar mwaka 1964 Tanzania imepata mafanikio ya makubwa kiuchumi ambapo alisema Takwimu zinaonesha kuwa mwenendo wa ukuaji wa uchumi katika kipindi cha miaka

60 umekuwa ni wa kuridhisha ambapo Pato Ghafi la Taifa limeendelea  kukua na kufikia shilingi trilioni 170.3 mwaka 2022 kutoka shilingi trilioni 156.4 mwaka 2021.

Aidha alisema , Pato la Taifa kwa mtu limekuwa likiongezeka mwaka hadi mwaka na kufikia wastani wa shilingi 2,844,641 (sawa na dola za Marekani 1,229.1) mwaka 2022 kutoka wastani wa shilingi 2,708,999 (sawa na dola za Marekani 1,173.3) mwaka 2021.

Share:

Read More

PPRA yafungua ofisi za Kanda kusogeza huduma kwa wananchi

Na Mwandishi wetu

MAMLAKA  ya Udhibiti wa Ununuzi wa Umma (PPRA) imefungua Ofisi katika kanda tano nchini na kuwa na jumla ya kanda sita, ikiwa ni sehemu ya jitihada za kusogeza huduma kwa wananchi na kuongeza ufanisi katika kusimamia sekta ya ununuzi wa umma. 

Hayo yameelezwa na Mkurugenzi Mkuu wa Mamlaka hiyo, Bw. Eliakim Maswi katika kikao cha wafanyakazi wa Mamlaka kilichohudhuriwa na Viongozi wa Chama cha Wafanyakazi wa Serikali na Afya (TUGHE) ngazi ya Mkoa, kilichofanyika jijini Dodoma hivi karibuni. 

Amezitaja ofisi hizo za Kanda kuwa ni Kanda ya Ziwa (Jengo la Ofisi ya Mkuu wa Mkoa wa Mwanza), Kanda ya Kati (Ofisi ya Mkuu wa Mkoa wa Tabora), Kanda ya Kaskazini (Jengo la PSSSF jijini Arusha), Kanda ya Nyanda za Juu Kusini (Jengo la NHIF jijini Mbeya) na Kanda ya Kusini (Jengo la PSSSF mjini Mtwara). Orodha hiyo inafanya Mamlaka kuwa na jumla ya ofisi sita za kanda kwa kujumlisha na ofisi ya kanda ya Pwani iliyopo jengo la Wizara ya Fedha Jijini Dar es salaam iliyokuwepo awali.

‘’Naishukuru sana Serikali ya Awamu ya Sita chini ya uongozi wa Mhe. Rais, Dkt. Samia Suluhu Hassan kwa kuiwezesha Mamlaka kusogeza huduma kwa wananchi. Hii ni sehemu ya mafanikio ya miaka mitatu ya uongozi wake. Sasa wananchi hawatakuwa na ulazima wa kuja Dodoma ili wafike PPRA, kila kanda watahudumiwa kikamilifu,” alisema Bw. Maswi. 

Ameongeza kuwa kila Kanda imewezeshwa kuwa na wafanyakazi wa idara zote ili kuhakikisha kuwa huduma zinazotolewa zinakidhi mahitaji ya wananchi na wadau wa sekta ya ununuzi katika maeneo yao, akisisitiza kuwa wameweka nguvu pia kwenye utoaji wa huduma za Mfumo wa Usimamizi wa Ununuzi wa Umma Kielektroniki (NeST). 

Aidha, amewasihi wafanyakazi wa Mamlaka hiyo kuendelae kufanya kazi kwa bidii na kwa kuzingatia uzalendo ili kufanikisha malengo ya serikali ya kuhakikisha thamani ya fedha inapatikana kwenye ununuzi wa umma. 

“Ninawaomba watumishi wenzangu mwende mkatengeneze uhusiano mzuri katika utekelezaji wa majukumu ya Mamlaka, hii itawasaidia kuendelea kuaminika kwa wananchi na mtapata ushirikiano mkubwa kwa viongozi wa mikoa hiyo,” amesisitiza. 

Mwenyekiti wa TUGHE Mkoa wa Dodoma, Bw. Maulid Kipeneku ametoa rai kwa wafanyakazi PPRA kuhakikisha wanafanya kazi kwa weledi, kwa kuzingatia sheria na taratibu. Aliwapongeza wafanyakazi hao kwa jinsi wanavyotoa huduma kwa wananchi, na kwamba anaamini wafanyakazi hodari watapatikana ndani ya Mamlaka hiyo.

Mwisho

Share:

Read More

Rais Samia afanya ujenzi na uhamisho wa viongozi

Rais Dkt.Samia Suluhu Hassan 

Share:

Read More

Mama aliyeua watoto wake wawili kwa kuwanywesha sumu afariki

NA MWANDISHI WETU,MBEYA

MAMA mzazi wa watoto wawili walionyweshwa sumu  aitwaye Daines Mwashambo ((30)mkazi wa Kijiji cha Mashese kata ya Ilungu wilaya ya Mbeya aliyekuwa anaendelea na matibabu katika hospitali ya rufaa ya mkoa wa Mbeya amefariki dunia wakati akiendelea na matibabu.

Kamanda wa Polisi mkoani Mbeya, Benjamin Kuzaga amesema mama huyo alifariki March 9 mwaka huh  majira ya saa 10.15 jioni katika hospitali ya rufaa ya mkoa wa Mbeya.

Kamanda Kuzaga amesema kuwa March 5 mwaka huu  mtuhumiwa Dainess  akiwa nyumbani kwake Kijiji cha Mashese  kata ya  Ilungu aliwanywesha sumu ya kuulia magugu aina ya “Pare Force” watoto wake wawili na kusababisha vifo vya watoto hao 

Amesema kuwa baada ya  kutekeleza tukio hilo la kuwanywesha sumu watoto wake mtuhumiwa nae alikunywa sumu hiyo  iliyopelekea kukimbizwa Hospitali ya Rufaa ya  Mkoa wa Mbeya kwa matibabu.

Aidha Kamanda Kuzaga amesema mtuhumiwa aliendelea kupatiwa matibabu Hospitalini hapo lakini  alifariki duniani.March 9 mwaka huu.

Share:

Read More

Dkt.Mpango aridhishwa usambazaji gesi asilia

 

              NA JOYCE KASIKI,DODOMA

MAKAMU wa Rais Dkt.Philip Mpango ameoneshwa kuridhishwa na kazi inayofanywa na Shirika la Maendeleo ya Petroli nchini (TPDC) ya kuwaunganishia wananchi gesi asilia kutoka kwenye bomba kuu.

Akizungumza wakati wa kukagua mabanda kwenye Kongamano la Wanawake la Nishati safi ya kupikia, Dkt.Mpango amesema shirika hilo linafanya kazi nzuri ambayo itachangia wananchi kuachana na nishati chafu ya kupikia.

Hata hivyo amemtaka Mkurugenzi Mtendaji wa Shirika hilo  Mussa Makame kuhakikisha wanaendelea kusambaza gesi asilia kwa wananchi huku akilitaka shirika hilo liangalie uwezekano wa njia za kulipatia pesa shirika kwa ajili kuliongezea nguvu katika utekelezaji wa majukumu yake.

Awali Mkurugenzi Mtendaji wa TPDC  Makame  amesema shirika hilo limeanza safari ya
kuwezesha wananchi wa Mikoa ya Lindi,Mtwara,Pwani na Dar es Salaam kutumia gesi asilia inayozalishwa hapa nchini.

Aidha amesema mpaka sasa  wameshaunganisha takriban taasisi 13 zikiwemo baadhi ya magereza na shule pia wameunganisha wananchi 1500.

Hata hivyo Mkurugenzi huyo amesema changamoto kubwa wanayokabiliana nayo ni usambazaji wa gesi kwa bomba njia ambayo gharama yake ni kubwa huku akisema wanaangalia uwezekano wa kusambaza gesi asilia kwa njia ya mitungi ili kuwezesha wananchi wengi zaidi kuhama kwenye matumizi ya kuni na mkaa na badala yake waanze kutumia nishati safi ya kupikia.

Share:

Read More

Rais Dkt.Samia aamsha shangwe ya wanawake,azungumza nao kwa njia ya simu

         NA JOYCE KASIKI,DODOMA

RAIS wa Jamhuri ya Muungano wa Tanzania Dkt. Samia Suluhu Hassan ameamsha shangwe ya wanawake katika ukumbi wa jakaya Kiwete jijini Dodoma baada ya kuzungumza nao kwa njia ya simu huku akiwaahidi kutumia nafasi yake ya kinara wa Nishati safi ya kupikia Afrika kwamba  ameibeba agenda hiyo ili wananchi hususan wanawake waachane na matumizi ya kuni na mkaa.

Akizungumza na wanawake hao kupitia simu ya mkononi ya Makamu wa Rais Dkt.Philip Mpango ambaye alikuwa mgeni rasmi kwenye kongamano la wanawake la Nishati safi ya kupikia ,Rais Dkt.Samia amesema matumizi ya nishati safi ya kupikia ni muhimu ili kuokoa vyanzo vya maji na kutunza mazingira.

"Tukiwa tumesherehekea siku yetu jana Mimi Kiongozi wenu nabeba agenda ya nishati safi ya kupikia barani Afrika na mimi ndio champion wake,na niseme tu nimefurahishwa na maandalizi ya Mkutano huu ambao walengwa wake ni wanawake." amesema Rais Dkt. Samia na kuongeza kuwa  

" Ahadi yangu kwa wizara ya Mazingira na wizara ya Nishati nitaibeba hiyo agenda nikisaidiwa na ninyi na kama mnavyojua mwezi wa tano tunakwenda kutafuta fedha za kukuza Nishati safi ya kupikia Afrika, sasa katika Afrika nitaibeba nchi yetu kadiri nitakavyoweza"alisisitiza Dkt. Samia

Ametumia nafasi hiyo kuwaasa wanawake waliohudhuria kongamano hilo kwenda kuwaelimisha wanawake wengine kwenye maeneo yao ili wanawake wengi sasa aanze kutumia Nishati safi ya kupikia. 

Makamu wa Rais Dkt. Philip Mpango alisema kukuza Nishati safi ya kupikia ni moja ya agenda za kipaumbele za Taifa huku alisema serikali itaendelea kuongeza rasilimali kuhakikisha agenda hiyo inafanikiwa. 

Amesisitiza ushirikiano wa dhati kati ya Serikali, asasi za kiraia, sekta binafsi na Bunge ili Serikali ifanikiwe kupunguza na hatimaye kuondoa kabisa matumizi ya nishati chafu ya kupikia. 

Kwa upande wake Naibu Waziri Mkuu ambaye pia ni Waziri wa Nishati Dkt. Doto Biteko alisema kuwa sekta ya nishati nchini inachangia kwa kiasi kikubwa kwa maendeleo ya Uchumi wa Nchi na kwamba Nishati safi ya kupikia inachangia takribani asilimia 90 ya nishati yote inayotumika nchini. 

"Matumizi ya kuni ni asilimia 63.5,matumuzi ya mkaa ni asilimia 26.2 na matumizi ya gesi za mitungi ni asilimia 5.1 peke yake wakati matumizi ya umeme yakiwa chini sana kwa asilimia 3."amesema Dkt.Biteko

 Awali  Mwenyekiti wa Umoja wa Wanawake CCM Taifa(UWT) Mary Chatanda amesema kuwa hatua hiyo ya kuhakikisha wanawake wengi wanatumia Nishati safi ya kupikia pamoa na mambo mengine itasaidia wakina mama  kulinda afya zao kutokana na mgonjwa ya mapafu,kulinda mazingira kutokana na mabadiliko ya tabia nchi na kuwapatia wanawake muda wa kutosha kufanya kazi za uchumi na kuweza kukua kwa uchumi wa familia.

Chatanda ametumia nafasi hiyo kuiomba Serikali kuona namna ya kupunguza gharama za nishati safi ya kupikia ili wananchi wengi hususan wanawake waweze kumudu gharama .

Share:

Read More

Halmashauri ya Hanang ,SUMAJKT watiliana saini ujenzi wa nyumba za waathirika wa maporomoko ya udongo

      Na Mwandishi wetu ,Manyara

 

HALMASHAURI ya Hanang’ imetiliana saini na Shirika la uzalishaji Mali la Jeshi la Kujenga Taifa (SUMAJKT) kwa ajili ya ujenzi wa nyumba 108 za waathirika wa maporomoko ya udongo yaliyotokea hivi karibuni Katesh katika wilaya ya Hanang mkoani Manyara.

 

Mkuu wa  mkoa Manyara Queen Sendiga ameshuhudia utiaji saini huo ambapo amesema kutokana na kazi ambazo zimekuwa zikifanywa na SUMAJKT ana mategemeo makubwa kuwa watejenga  nyumba  zilizo bora na kukamilika kwa wakati.

 

“Tunategemea na kwa uzoefu wao SUMAJKT ambao wao wenyewe wamekiri kwamba nyumba hizi zitajengwa katika mtindo wa oparesheni hivyo zitajengwa kwa muda mfupi ,na hata mimi nakiri kwamba zitamalizika katika muda mfupi na kwa ubora unaotakiwa na watakaopata nyumba hizo wajue kweli wamepata nyumba.”amesema

 

Naye Mkurugenzi Mtendaji wa SUMAJKT Kanali Petro Ngata,  ameeleza kuwa SUMAJKT ipo tayari kutekeleza jukumu ililopewa na serikali na katika muda waliopangiwa kutekeleza na kwamba watakamilisha jukumu hilo wa wakati.

 

Mshauri wa ujenzi huo kutoka ofisi ya Waziri Mkuu Joseph Msangi, amesema kuwa maandalizi ya ujenzi wa nyumba hizo tayari yamekamilika.

 

Amesema SUMAJKT limekuwa likipatiwa miradi ya kimkakati na serikali kutokana na utendaji wa kazi kwa ufanisi, ubora na kumaliza kazi kwa wakati.

 

Share:

Read More

Hospitali za Rufaa za Mikoa kuwahudumia wananchi bila kuchoka

Dkt.Ernest Ibenzi akizungumza na waandishi wa habari

Na Joyce Kasiki Dodoma

MGANGA Mfawidhi Hospitali ya Rufaa ya mkoa wa Dodoma ambaye pia ni Mwenyekiti wa Waganga wafawidhi hospitali za Rufaa za Mikoa 28  Tanzania Bara Dkt.Ernest Ibenzi amesema ,licha ya hospitali kususia kupokea wagonjwa wanaotumia Bima ya Afya kutokana na Serikali kuboresha kitita katika Bima hiyo,hospitali hizo zipo tayari na zimejipanga kuwahudumia wagonjwa kwa wakati ma bila kuchoka.

Akizungumza na waandishi wa habari hospitalini hapo,Dkt.Ibenzi amesema hospitali za Rufaa za Mikoa ikiwemo ya mkoa wa Dodoma zimejipanga na kuongeza muda wa kuwahufumia wagonjwa kwa kufanya kazi saa 24 huku madaktari bingwa wakipatikana muda wote.

"Hospitali za Rufaa za Mikoa wamekubaliana kwamba wataona wagonjwa wote bila kujali muda wa saa za kazi ndipo wafunge kutoa huduma tofauti na awali ambapo walihudumia wagonjwa mpaka saa tisa na nusu."amesema Dkt.Ibenzi na kuongeza kuwa

"Hospitali zote za Rufaa za Mikoa zina wataalam wa kutosha na zinahudumia wagonjwa wote wenye keshi,wanaohudumiwa kupitia Bima za Afya na wale wanaohitajji msamaha."

Aidha Dkt.Ibenzi amesema hali ya utoaji huduma katika hospitali hizo imeboreka kutokana na Serikali kutoa vifaa tiba na vitendanishi vya kutosha. 

"Hospitali zote 28 za Rufaa za Mikoa Tanzania Bara zimejipanga kuwahudumia wagonjwa na hapa utaona hata katika huduma za kliniki tulikuwa tunaanza saa mbili asubuhi lakini sasa tumekubaliana kuanza huduma hizo saa moja na tutawaona wagonjwa wote mpaka wanapoisha ndipo tufunge na siyo kufunga saa tisa na nusu kama ilivyokuwa awali."amesema Dkt.Ibenzi

Ametumia nafasi hiyo kuishukuru Serikali kupitia Wizara ya Afya kwa kupeleka wataalam  wa kutosha na hivyo kuwezesha wagonjwa kuhudumiwa kwa wakati na bila kuchoka.

Share:

Read More