RITA waeleza umuhimu wa cheti cha kuzaliwa

AFISA Mwandamizi wa Usajili kutoka Wakala wa Usajili, Ufilisi na Udhamini (RITA) Jonathan Magoti akizungumza na waandishi wa habari jijini Mbeya katika maonyesho ya wakulima Nane Nane 

 

NA JOYCE KASIKI,DODOMA 

AFISA Mwandamizi wa Usajili kutoka Wakala wa Usajili, Ufilisi na Udhamini (RITA) Jonathan Magoti amewaasa wananchi kujenga utaratibu wa kupata vyeti vya kuzaliwa badala ya kusubiri mpaka wawe na shida ndipo waanze kutafuta vyeti hivyo.

Akizungumza na waandishi wa habari katika Banda la Wakala huo Magoti amesema,cheti cha kuzaliwa ni muhimu kwani kinahitajika katika maeneo mengi ikiwemo katika upatikanaji wa kadi ya NIDA pamoja na huduma nyingine.

“Cheti cha kuzaliwa ni muhimu sana kwa sababu kinahitajika katika mifumo mbalimbali ya Serikali ,kwa mfano mtu anapohitaji kitambulisho cha NIDA, mtoto anapohitaji kwenda shule lazima atambulishwe kwa cheti cha kuzaliwa ,hata mtu anapohitaji kadi ya Bima ya Afya lazima awe na cheti cha kuzaliwa ili kimtambulishe ,hata uhamiaji wanahitaji kupata utambulisho kutoka Rita”amesema Magoti

Aidha amesema,kwa watoto wachanga cheti hicho kinatolewa ndan ya siku 90 bure na kuwahimiza wazazi na walezi kufuatilia vyeti hivyo vya watoto ili kuondoa usumbufu pindi wanapohitaji huduma mbalimbali zikiwemo huduma za afya na kielimu.

 “Wananchi wajenge desturi ya kuhakikisha mtoto anapata cheti mara tu anapozaliwa ambapo ndani ya siku 90 mara baada ya kuzaliwa cheti hicho kinatolewa bure .”amesisitiza

Aidha amesema wakala huo upo katika maonyesho hayo kwa madhumuni ya kutoa elimu kuhusiana na huduma zitolewazo na RITA lakini pia wanafanya usajili wa vyeti upande wa vizazi na vifo pia wanafanya usajili hata kwenye masuala ya ndoa kwa wachungaji na Masheikh wanaotaka kusajiliwa kwa ajili ya huduma mbalimbali za ndoa pamoja na masuala ya kisheria kuhusiana na udhamini,na kuandika na kuandaa wosia.

“Kwa hiyo unapokuja uwanjani hapa unapata elimu pamoja na kusajiliwa pia unapewa na cheti cha kuzaliwa ndani ya siku moja au mbili ili mradi tu awe ana vielelezo vinavyotakiwa.”

Aidha ameeleze changamoto wanayokutana nayo katika maonyesho pindi wananchi wanapofuata vyeti vya kuzaliwa wanakwenda bila vielelezo vinavyomtambulisha mtoto au muhusika anayehitaji cheti hicho.

“Changamoto tuliyonayo ni elimu ambayo inaonekana ilikuwa bado haijawafikia wananchi kwa sababu wanaposajili vizazi na vifo tunahitaji vielelezo vinavyotambulisha umri wa mteja na baadhi ya taarifa, kwa hiyo wateja wanakuja bila vielelezo vya kutosha.”

Hata hivyo amesema mwitiko wa wananchi kufika katika banda hilo na kupata huduma mbalimbali ni mkubwa kwani wengi wamekuwa wakifika kwa ajili ya kupata huduma hasa ya vyeti vya kuzaliwa.

Edwin Simbili ni miongoni mwa wananchi waliotembelea katika banda la RITA katika maonyesho hayo ambapo ameishukuru Serikali kwa kupeleka  huduma hiyo katika viwanja vya Nane Nane ambapo wananchi wamepewa vyeti lakini pia wanatoa elimu mbalimbali kuhusiana na shughuli zao huku akiiomba serikali iendelee kuelimisha wananchi kuhusu huduma zitolewazo na RITA na umuhimu wa vyeti vya kuzaliwa 

Share: