Dkt.Stergomena ashiriki mkutano wa Tume ya kudumu ya Pamoja baina ya Tanzania na Msumbiji
 |
| WAZIRI wa Ulinzi Dkt.Stergomena Tax akizungumza kwenye Mkutano wa Tume ya Pamoja baina ya Tanzania na Msumbiji. |
NA MWANDISHI WETU
WAZIRI wa Ulinzi na Jeshi la Kujenga Taifa Dkt. Stergomena Tax ameshiriki Mkutano wa Nne wa Tume ya Kudumu ya Pamoja ya Ushirikiano katika msuala ya Ulinzi na Usalama (JPCDS) baina ya Tanzania na Msumbiji uliofanyika katika Ukumbi wa Joachim Chisano, Maputo nchini Msumbiji.
Waziri Tax ni Mwenyekiti Mwenza wa
Waziri wa Ulinzi wa Msumbiji Cristovao Chume.
Mkutano huo unafanyika kwa mara ya nne sasa ambapo Mkutano wa kwanza ulifanyika hapa nchini mkoani Dar es Salaam, Februari 04 - 06 Februari, 2011 ambapo Tume hiyo ilianzishwa rasmi.
Mkutano huo umefanyika kwa ngazi
tatu, ambapo ulianza kwa kutanguliwa na ngazi ya wataalamu , ukifuatiwa na
kikao ngazi ya Makatibu Wakuu na kuhitimishwa na Mkutano wa mawairi wenye
dhamana ya masuala ya ulinzi na Usalama wa mataifa haya mawili.
Pamoja na mambo mengine vikao vya ngazi zote vilijadili ushirikiano kuhusu masuala ya kiulinzi, na hatimaye kutoa fursa kwa Mawaziri hawa wawili, kusaini mikataba itakayowezesha kutekelezwa kwa Hati ya Makubaliano kuhusu ushirikiano kupitia sekta ya Ulinzi na usalama, uliosainiwa kwa pamoja 21 Septemba, 2022 na Mawaziri wa pande zote mbili.
Utiaji saini huo, ulishuhudiwa na Rais wa Jamhuri ya Muungano wa Tanzania, Mheshimiwa Samia Suluhu Hassan na mwenzake Rais wa Msumbiji, Mheshimiwa Filipe Jacinto Nyusi, wakati wa ziara ya kikazi ya siku tatu, aliyoifanya Rais Samia nchini Msumbiji hivi karibuni.
Miongozo ya uanzishaji na uendeshaji mabaraza ya watoto uwafikie watendaji wa mitaa na vitongoji
 |
| Waziri wa Maendeleo ya Jamii,Jinsia,Wanawake na Makundi Maalum Dkt.Dorothy Gwajima akiagana na wanafunzi jijini Dodoma |
Na WMJJWM, Dodoma
Waziri wa Maendeleo ya Jamii, Jinsia, Wanawake na Makundi Maalum Dkt.Dorothy Gwajima amewaagiza Maafisa Maendeleo ya Jamii na Maafisa Ustawi wa Jamii kuhakikisha Miongozo ya Uanzishaji na Uendeshaji wa Mabaraza ya Watoto na Madawati ya Ulinzi kwa Watoto yanawafikia watendaji wote hadi ngazi ya Mtaa na Kijiji.
Dkt. Gwajima ametoa agizo hilo alipotembelea na kuzungumza na wanafunzi wa Shule ya Msingi Makulu na Shule ya Sekondari Sechelela katika Kata ya Dodoma Makulu, Jijini Dodoma Oktoba 30, 2022 kwa lengo la kukagua utekelezaji wa uanzishaji na Uendeshaji wa Mabaraza ya Watoto na Madawati ya Ulinzi wa Watoto Shuleni.
Amesema miongozo na nyaraka ambazo kila mwananchi hususani watendaji wanatakiwa kuielewa ili kurahisisha utendaji, hivyo hazitakiwi kufungiwa ofisini.
"Hii ni nyaraka ya wazi, kila mtu anatakiwa aisome, kuanzia Mwenyekiti wa mtaa, kijiji hizi hazitakiwi kufungiwa kabatini" amesema Dkt.Gwajima
Ametumia wasaa huo pia kuzungumza na wanafunzi wa shule hizo na kuwataka kuyatumia vema mabaraza ya watoto ili kujilinda dhidi ya ukatili mahali popote.
Dkt.Gwajima ameongeza pia kwamba, Serikali inafanya jitihada nyingi kutokomeza ukatili dhidi ya watoto ikiwemo kuanzisha mabaraza ya watoto na madawati ya ulinzi yawasaidie kujadili changamoto wanazokutana nazo na kutoa taarifa za viashiria vya ukatili panapostahili.
Kwa upande wao wanafunzi wa shule hizo wamemshukuru Waziri Gwajima Kwa juhudi zake za kukabiliana na vitendo vya ukatili na kuwa mabaraza na madawati ya ulinzi yamewasaidia kupunguza changamoto nyingi hasa mimba za utotoni.
"Katika shule yetu Dawati
limetusaidia hasa watoto wa kike kwani kabla ya Dawati walikosa mahali pa
kusemea shida zao" amesema Irene Boniphace
Naye mwalimu Mkuu wa shule ya Sekondari Sechelela Grace Shiri amesema madawati ya watoto shuleni yamewasaidia hata walimu na wanafunzi katika shule hiyo.
"Dawati la wanafunzi limewasaidia
kujitambua na kuweza kusema shida zao pale wanapopata ukatili ndani na nje ya
shule, kujua majukumu yao na walimu yametusaidia kujua kwa haraka matatizo yao,
wamekuwa wazi na wanaongozana wenyewe" amesema Shiri
Watoto wanaoishi mazingira hatarishi watambuliwe
 |
| RAIS Samia Suluhu Hassan akihutubia viongozi mbalimbali katika hafla ya utiaji saini mkataba wa usimamizi wa shughuli za lishe . |
NA JOYCE KASIKI,DODOMA
RAIS Samia Suluhu Hassan ameiagiza Wizara
ya Maendeleo ya Jamii ,Jinsia,Wanawake na Makundi Maalum kuwatambua watoto wote
wanaoishi katika mazingira hatarishi ili Serikali iweze kuwasaidia kwa kuhakikisha wanalelewa,wanakua vizuri na kufukia utimilifu wao ambao utaleta tija katika maisha yao ya baadaye na Taifa kwa ujumla.
Ameyasema hayo mwishoni mwa wiki Mtumba
katika hafla ya utiaji saini mkataba wa lishe kwa Wakuu wa mikoa hapa nchini.
“Pamoja na kuwekeza katika suala la lishe,
lakini tunafahamu kuwa wimbi la watoto wanaoishi katika mazingira hatarishi
linazidi kuwa kubwa “amesema Rais Samia
Amesema,mwaka 2021 jumla ya watoto
992,901 walitambuliwa na kupewa huduma mbalimbali za kukabiliana na lishe duni
na utapiamlo huku akihimiza kuendelea kutambuliwa kwa watoto hao ili kuimarisha
afua za ukuaji wao na waweze kufikia hatua timilifu za ukuaji.
“Kuna watoto wanaishi katika mazingira
magumu na kukua kwao kunakuwa kugumu hivyo hivyo, na hawa ndiyo wanakuja kuwa
wahalifu wa baadaye kwa sababu kama anaishi mazingira magumu atatoka mapema
nyumbani kwenda kujitafutia ,hana elimu hana namna yoyote lakini anakwenda kujitafutia,lazima wengi wao watakuwa
wezi,watakuwa na vitendo viovu halafu tunakuja kupiga kelele.”amesema na
kuongeza
“Gwajima (Waziri wa Maendeleo ya Jamii
,Jinsia,Wanawake na Makundi Maalum) hili la kwako,mkahakikishe watoto wanaoishi
mazingira magumu na hatarishi wanatambuliwa na tunawasaidia.”
Kwa upande wake Waziri wa Afya Ummy
Mwalimu amesema lishe bora ni msingi wa afya na uchumi wa mtu mmoja mmoja ambapo
suala hili linapaswa kuzingatiwa kuanzia kwenye malezi na makuzi ya watoto ili
kueta tija kwa Taifa.
“Lishe mbovu inaleta utapiamlo ambao
unaleta madhara ya kiafya na kiuchumi na hivyo kuathiri maendeleo ya mtu
binafsi na jamii kwa ujumla ,lakini utapiamlo wa kuzidi au wa kupungua
virutubishi mwilini unapelekea magonjwa ya mara kwa mara na magonjwa yasiyo ya
kuambukiza na hivyo kuathiri kipato cha familia na sekta ya afya.
Aidha amesema,udumavu kwa watoto unasababisha
madhara ya kiakili na kimwili ya muda mrefu yanayoweza kupelekea magonjwa ya
mara kwa mara ,upungufu wa uelewa darasani hatimaye kuathiri uchumi wa nchi
hapo baadaye .
“Tunaweza tukadharau suala hili la lishe
tukawekeza kwenye barabara na vitu vingine ,lakini lazima tujue hivyo vikibomoka
tunaweza kupata fursa ya kukarabati ,lakini kwenye lishe na ubongo wa mtoto ,hatuna
fursa ya kukarabati baada ya miaka
mitano,kwa hiyo wakati wa kuwekeza kwa mtoto ni sasa na hapa tutapata Taifa
lenye watu wenye tija.”amesema
Hata hivyo amesema,nchi inaenda vizuri
katika suala la lishe huku akisema Tafiti za TDHS zinazotumika inaonyesha utapiamlo
,ukondefu kwa watoto chini ya umri wa miaka mitano umepungua kutoka asilimia 4.5 mwaka 2015/16
hadi kufikia asilimia 3.5 mwaka 2018.
Kuhusu upungufu wa damu kwa wanawake
wenye umri wa kuzaa umepungua kutoka asilimia 45 mwaka 2015/16 hadi asilimia 29
mwaka 2015/16 huku udumavu nao ukipungua kutoka asilimia 34 mwaka 2015/16 hadi
kufikia asilimia 32 mwaka 2018/19.
“Lakini sasa hapa kwenye udumavu ,maana
yake tunapozungumza asilimia 32,watoto wenye umri wa miaka mitano kwa mujibu wa
sensa ya mwaka 2012 ni kama takriban watoto milioni tisa kwa hiyo tunazungumza
watoto milioni tatu Tanzania wana udumavu,wamedumaa na hawafundishiki,
“Pia
watoto hawa hawaelewi,hawawezi kuwa wabunifu katika kufanya kazi na kuleta
maendeleo ya nchi ,tunaweza tukapishana huko mikoani,mawizarani lakini tayari
ubongo wa huyo mwenzetu ulishadumaa hauwezi kubadilikahauwezi kuingiza
vipya,hauwezi kuja na ubunifu wa mambo mapya.
Kutokana na hali hiyo amesema Wizara ya
Afya itaendelea na jukumu la kuandaa na kuto sera miongozo na mikakati ya afya
ikiwemo huduma za lishe na kuzifanyia kazi sera zilizopitwa na wakati kwa
maslahi mapana ya watoto hapa nchini na Taifa kwa ujumla.
Kuhusu kupunguza udumavu kwa watoto amesema
wataendelea kushirikiana na wadau wa lishe nchini kutekeleza afua za lishe
zenye matokeo makubwa zinazolenga siku 1000 za maisha ya mtoto ikiwemo utoaji
wa madini ya chuma na acid ya folic kwa akina mama wajawazito takriban kwa
akina mama wajawazito milioni 2.3 kwa mwaka.
Naibu Katibu Mkuu Afya Dkt.Grace Maghembe
amesema,mkakati uliowekwa ni kuwafikia wananchi ili waweze kuelewa suala hili
la lishe kwa kurejesha siku ya maadhimisho ya lishe ya kijiji ili iweze kuadhimishwa kwenye ngazi ya kijiji .
Vile vile amesema pia mpango ni
kuelimisha jamii kupitia wahudumu wa ngazi ya afya ya jamii na kufanya vikao
vya tathimini kwa ngazi ya kata na ngazi ya kijiji badala ya tathimini hizo
kufanyika katika ngazi ya mikoa na halmashauri lakini pia kutumia mitandao ya
kijamii ili elimu iweze kufika kwa jamii.
Kozi ya wasaidizi wa kisheria kuanza kutolewa nchini
 |
| Mkuu wa kitengo Cha sheria katika Taasisi ya Mafunzo ya uanasheria kwa Vitendo (LST) Berinda Mollel akizungumza jijini Dodoma katika ukubi wa Jakaya wakati wa Mkutao wa Chama cha Mawakili wa Serikali. |
NA JOYCE KASIKI,DODOMA
TAASISI ya Mafunzo ya sheria kwa vitendo imesajili kozi ya wasaidizi wa kisheria ambayo
pia itaanza kutolewa mwaka huu hapa nchini ili kulijengea uwezo kundi hilo la
wasaidizi wa kisheria.
Hayo yamesemwa jijini Dodoma na Mkuu wa kitengo Cha sheria katika
Taasisi ya Mafunzo ya uanasheria kwa Vitendo (LST) Berinda Mollel huku akisema
kozi hiyo itaanza kutolewa mwaka huu.
Vile vile Mollel amesema,wao kama wataalam wanaotoa
mafunzo ya weledi katika ngazi ya watu waliohitimu shahada ambapo wanapenda kuwa mawakili au watumishi wa umma .
“Pia tunatoa mafunzo ya weledi kwa wasaidizi wa
kisheria ,kwa hiyo jukumu letu sisi tulilopewa na nchi ni kutoa mafunzo haya
kwa sababu ndiyo taasisi pekee inayotoa mafunzo ya weledi katika ngazi hii.”amesema
na kuongeza kuwa
“Tangu kuanzishwa kituo hicho miaka 12 iliyopita tumezalisha
maelfu ya mawakili ambao wengi wao wanafanya kazi hii ya uwakili katika maeneo
mbalimbali.”amesisitiza
Mollel ametumia nafasi hiyo kuwaasa wahitimu wote wa shahada ya sheria kutoka vyuo
vinavyotambulika na Serikali wanaotarajia kufanya kazi kama mawakili binafsi
nchini au katika utumishi wa umma kufanya mafunzo ya mwaka mmoja katika
taasisi hiyo huku akiainisha kuwa wahitimu hao ni wale waliomaliza
shahada zao baada ya sheria kuanza kufanya kazi mwezi Mei 2017.
“Dhamira kuu ya taasisi hii ni kutoa ushauri
wa kisheria kwa watoto,kutoa ushauri wa kisheria kwa wanawake,kuandaa nyaraka
za mahakamani, kufuatilia mwenendo wa kesi mahakama kutoa mwongozo wa taratibu
za kufuatilia kesi, kutoa msaada wa kisheria katika makundi mengine sambamba na
usuluhishi wa migogoro”amesema Mollel
NIC Shirika la Bima linalotoa huduma bora na kwa haraka
 |
| Mkuu wa Kitengo cha Uhusiano wa Shirika la Bia la Taifa (NIC) Karimu Meshack akizungumza na waandishi wa habari jijini Dodoma wakati wa Mkutano wa chama cha Mawakili Tanzania |
NA JOYCE KASIKI,DODOMA
MKUU wa Kitengo cha Uhusiano wa Shirika la Bima la
Taifa (NIC) Karimu Meshack amesema,Shirika hilo ni moja ya mashirika bora
yanayotoa huduma bora za bima kwa wananchi zinazohusiana na majanga mbalimbali.
Akizungumza na waandishi wa habari jijini Dodoma wakati
wa Mkutano wa Chama cha Mawakili Tanzania,Meshack amesema,lengo la shirika hilo
ni kutoa huduma bora kwa watanzania waliojiunga na shirika hilo kwa wakati
pindi wanapopata majanga mbalimbali.
“NIC ni Shirika la serikali lakini pia ni shirika
la kibiashara la kutoa huduma za Bima za mali na ajali pamoja na bima za maisha
,shirika mwanzo lilikuwa haliwezi kutengeza faida hivyo lilikuwa likijiendesha
kwa hasara,lakini kwa miaka minne mfululizo limekuwa likiendeshwa kwa faida
ambapo kwa mfano rekodi ya mwaka 2020/21 tumeweza kutengeza faida ya shilingi
bilioni 72.”amesema Meshack
Amesema Shirika hilo limeweza kutengeza faida
kutokana na mapinduzi ya kimaendeleo katika maeneo matatu ikiwemo eneo la
rasimaliwatu kwa kutafuta wataalam wenye weledi wa kuweza kuliendesha shirika
pamoja na vijana wenye uwezo wa kufanya biashara
“Pia katika eneo la kimifumo ambapo shirika
linaendeshwa kidigitali shughuli zote za kibima zinafanyika kwenye sytems na
tumeanzisha mfumo ambao unatuwezesha kutoa huduma kwa wateja kwa haraka na
ufanisi wa kiwango cha juu,
“Kwa mfano katika shirika letu ndani ya siku saba
mteja anakuwa ameshapata huduma,ndani ya saa 24 mteja anapokuja kukata bima
anatakiwa kuwa ameshahudumiwa na anaendelea na shughuli zake kama kawaida.
Aidha amesema hivi sasa NIC lipo kwenye maeneo yote
nchini lakini kwa sababu ya maendeleo ya sayansi na teknolojia iliyopo mteja
anaweza kupata huduma za kibima kwa kutumia NIC Kiganjani akiwa mahali popote ili
mradi mteja awe na pesa kwenye simu yake ya kiganjani.
“Eneo lingine ni la kiubunifu , sasa hivi tume-‘restructure’
(tumetengeneza upya) bidhaa zetu zote za
kibima kwa mfano tunasukuma bidhaa moja ya Bimlife ambayo biashara hii
imefanyiwa utafiti kwa ajili ya kwenda kujibu changamoto zinazomkumba mtanzania
wa kawaida,
“Mfano hii Bimlife inatoa mafao ya msiba kwa
mwanachama aliyepatwa na msiba ambapo haina maana kwamba fedha ya rambirambi ,na
kwa kupata kwako fidia ya rambirambi haina maana kwamba itaenda kuchukua fedha
ulizowekeza kwenye Bimlife,ukifika wakati wa kupata mafao yako unayapata kwa
kiwago kile kile kwa mujibu wa mkataba lakini wakati huo masuala ya fidia au
rambirambi yanakuwa kama bonus .
Meshack ametumia nafasi hiyo kuwaasa watanzania
wajiunge na NIC ili waweze kupata huduma
za bima kwa sababu ni shirika ambalo linalipa ,na linaloongoza kwa mtaji ndio maana
‘tunasema sisi ndio Bima wengine wanafuata’
Kwa mujibu
wa Meshack Shirika lipo kwa ajili ya kusapoti jitihada za Serikali ya Jamhuri
ya Muungano ya Tanzania inayoongozwa na Rais Samia Suluhu Hassan kuwapasapot
kwenye miradi ya kimaendeleo,kuwapa sapoti kwenye shughuli za kiserikali na
watanzania wote kwa kurudisha kile kinachopatikana kwenye jamii.
“Kwa hiyo tunawashauri waje wakate bima
mbalimbali,kwa mfano bima ya nyumba ,watu wanafikiri kuna thamani kubwa sana
kukata bima ,nyumba ya milioni 100 ukiikatia bima NIC unalipia shilingi 177,000
kwa mwaka ,kwa hiyo upote nyumba yako ya milioni 100 uliyoisumbukia kwa miaka
mingi kuijenga ndani ya dakika moja,ndio maana tunawakaribisha watanzania waje
walitumie hili ni shirika lao.”amesisitiza
Kukosekana kwa huduma za MMMAM kunachangia kuwa na kundi kubwa la watoto waliokosa malezi bora
 |
| MKURUGENZI Msaidizi ,Ofisi ya Rais TAMISEMI nayeshughulikia Serikali za Mitaa Stephan Motambi akifungua kikao kazi cha tathimini ya utekelezaji ya Mradi wa Mtoto Kwanza ambao kwa sasa unatekelezwa katika mikoa kumi Tanzania Bara. |
 |
| BAADHI ya wadau wanaotekeleza mradi wa Mtoto kwanza wakiwa katika kikao cha tathimini ya utekelezaji wa Mradi wa Mtoto kwanza kilichofanyika jijini Dodoma. |
NA JOYCE KASIKI,DODOMA
MKURUGENZI Msaidizi Ofisi ya Rais Tamisemi anayeshughulikia Serikali za Mitaa Stephan Motambi amesema, kushindwa kufanya vizuri kwenye utoaji huduma za malezi,makuzi na maendeleo ya awali kwa watoto, kunachangia kuwa na kundi kubwa la watoto waliokosa malezi bora ambao wanakwenda kuwa mzigo kwa familia na Taifa kwa siku za baadaye.
Akifungua kikao cha wadau wa malezi,makuzi na maendeleo ya awali ya mtoto jijini Dodoma kilichoandaliwa na Mtandao wa Malezi na Makuzi ya Mtoto (TECDEN) Motambi amesema,hatua hiyo inasababisha kutumia fedha nyingi kwa ajili ya kuhudumia watoto hao kuliko ambazo zingetumika katika malezi na makuzi yao.
“Sasa hivi tunahitaji kuajiri maafisa ustawi wengi ili wakashughulikie changamoto za watoto wa mitaani na fedha nyingi inatumika,lakini kama wangepata malezi mazuri wasingekuwepo mitaani na hivyo fedha zinazotumika kuwahudumia hivi sasa zingefanya kazi nyingine kwenye Taifa.”amesema Motambi
Kufuatia hali hiyo amewataka Maafisa Maendeleo ya Jamii kutoka sekretarieti za mikoa kumi iliyoanza kutekeleza mradi wa Mtoto Kwanza kushiriki kikamilifu katika utekelezaji wa mradi huo ili kuhakikisha watoto wanakua na kufikia utumilifu wao na hatimaye kuwa na tija kwa Taifa lao.
“Maafisa Maendeleo ya Jamii kutoka sekretarieti za mikoa kumi iliyoanza kutekeleza mradi wa Mtoto Kwanza lazima muone kuwa hii ni fursa ya kuonyesha umahiri wenu katika kutekeleza afua zinazohusu malezi ya watoto, na mara nyingi mlikuwa mkalamika kwamba hamna wadau au mradi wa kuwawezesha kuifikia jamii,
“Sasa mradi huu wa mtoto kwanza muutumie vizuri na mshiriki kikamilifu katika kuutekeleza kwa faida ya jamii na Taifa,kushindwa kufanikiwa kwa mradi huu kutasababishwa na sisi wenyewe kushindwa kutimiza majukumu yetu sawasawa ,kwa hiyo nawaomba maafisa wote ,mshiriki na mtoe matokeo ambayo ni kufanikiwa kwa utekelezaji wa Programu Jumuishi ya Taifa ya Malezi,Makuzi na Maendeleo ya Awali ya Mtoto (MMMAM ).Amesema Motambi
Aidha amewataka watendaji wote
wanaofanya uratibu katika ngazi mbalimbali wahakikishe kwamba Programu hiyo
inatekelezwa kwa ufanisi ili dhima ya kuanzishwa kwa programu hiyo iweze
kufanikiwa.
Awali Mkurugenzi wa Mtandao wa Malezi,Makuzi na Maendeleo ya Awali ya Mtoto (TECDEN) Mwajuma Rwebangila amesema Mradi wa Mtoto kwanza unatekelezwa katika mikoa 26 Tanzania Bara ingawa kwa sasa wameanza na mikoa 10 ya Lindi ,Mbeya,Tabora,Dodoma,Rukwa,Manyara,Arusha,Morogoro,Dar es Salaam na Kagera .
Amesema,utekelezaji wa Mradi wa Mtoto kwanza umelenga katika kuchochea utekelezaji wa Programu Jumuishi ya MMMAM.
Kwa upande wake Mkurugenzi wa Shirika lisilo la kiserikali la Action For Community Care (ACC) linalotekeleza mradi wa Mtoto kwanza mkoani Dodoma Pendo Maiseli amesema,mwelekeo unaonyesha mradi huo kuleta ufanisi katika utekelezaji wa PJT-MMMAM.
Amesema,kwa kipindi cha miezi minne tangu wapatiwe elimu ya malezi,makuzi na maendeleo ya awali ya mtoto wao kama wadau wanaotekeleza mradi huo wamefanikiwa kuwakutanisha wadau kutoka mashirika mbalimbali yasiyo ya kiserikali yanayofanya shughuli za watoto na kuwapa uelewa kuhusu elimu ya malezi ,makuzi na maendeleo ya awali ya mtoto.
“Vievile tumefanya uzinduzi wa PJT-MMMAM kwa mkoa wa Dodoma ambao umeshirikisha wadau wengi,pia tumefanikiwa kuwafikia na kutoa elimu hii kwa wazazi na walezi 328 ,haya ni mafanikio kwetu ambayo tunaona ni mwelekeo mzuri katika utekelezaji wa Programu ya Taifa ya MMMAM.”amesema Maiseli
Akielezea kuhusu changamoto
amesema,bado wananchi hawana uelewa wa kutosha kuhusu suala la malezi,makuzi na
maendeleo ya mtoto huku akisema bado wadau wana kazi kubwa ya kutoa elimu kwa
jamii kuhusu suala hilo.
Rais Samia awaagiza Mawakili wa Serikali kushugulikia haraka na kwa haki kesi za uwekezaji
 |
| RAIS Samia Suluhu Hassan |
NA JOYCE KASIKI,DODOMA
RAIS Samia Suluhu Hassan ameiagiza Mawakili wa Serikali kushughulikia
kwa haraka na haki kesi za uwekezaji kwa
lengo la kukuza uchumi wa nchi huku akipiga marufuku kusainiwa mikataba ya
Serikali bila kushirikisha ofisi ya Mwanasheria Mkuu wa Serikali (AG) .
Akizungumza leo Septemba 29 ,2022 mwaka huu jijini Dodoma kwenye Mkutano
wa Chama cha Mawakili wa Serikali Rais Samia amesema,kwa kuishirikisha ofisi ya
AG katika kusaini mikataba hiyo itakwenda kuleta maslahi mapana kwa wananchi na
Taifa kwa ujumla.
Kwa mujibu wa Rais Samia ,huko nyuma mikataba ilisainiwa bila ofisi ya
AG kujua na wanapopata tatizo ndio
wanaikumbuka ofisi hiyo na huenda wakati huo waliosaini wameshastaafu au
wamtangulia mbele ya haki.
“Ninyi ndiyo majeshi ya kulinda
uchumi wetu kisheria ,uwekezaji lazima ulindwe lakini pia biashara lazima
zilindwe,na watu kulinda hayo yote ni ninyi,ninyi ni walinzi wa kalamu na
sheria siyo walinzi wa mabunduki kwa hiyo mwende mkalinde uchumi wetu ili nchi
hii iweze kupokea wawekezaji wengi zaidi, tuwekeze na tukuze uchumi kwa maslahi
mapana ya Taifa.”amesema Rais Samia
Kwa upande wake Waziri wa Katiba
na Sheria Dkt. Damas Ndumbaro amesema wizara inaanzisha mpango mahususi wa
utoaji msaada wa kisheria ambao utaluwa endelevu kwa lengo la kuwasaidia
wananchi ambao hawezi kumudu gharama.
Aidha amesema mpango huo utazinduliwa Desemba 10 mwaka huu ambapo siku hiyo , ni
siku ya haki duniani .
Wadau kutoka wilaya za Dodoma wakutana kujadili utelezaji wa PJT-MMMAM
 |
| AFISA Mradi,Mradi wa Mtoto kwanza Magret Mukama akifafanua jambo katika kikao kazi cha wadau kuhusu utekelezaji wa Programu Jumuishi ya Taifa ( MMMAM) kilichofanyika jijini Dodoma |
 |
| MATUKIO katika picha ni baadhi wadau walioshiriki katika kikao kazi hicho. |
NA JOYCE KASIKI,DODOMA
SHIRIKA lisilo la Kiserikali linalojishughulisha na
masuala ya Malezi na Makuzi ya Watoto ‘Action for Community Care
(ACC)’limewakutanisha Maafisa Maendeleo ya Jamii,Maafisa Ustawi na viongozi wa
Dini kutoka wilaya zote nane za Mkoa wa Dodoma kwa lengo la kuweka mpango kazi
wa pamoja katika utekelezaji wa Programu ya Taifa ya Malezi,Makuzi na Maendeleo
ya Mtoto (PJT-MMMAM) ya mwaka 2021/22-2025/26 hadi katika ngazi ya jamii.
Akizungumza wakati wa kikao kazi cha kuandaa mpango
kazi huo Afisa Mradi katika Mradi wa Mtoto kwanza Magret Mukama amesema,kwa
kuwakutanisha wadau inakwenda kuchochea utekelezaji wa Programu hiyo na
hatimaye kujenga watu ambao watakuwa na tija katika Taifa.
“Serikali
inatekeleza Programua ya Taifa ya Malezi ,Makuzi na Maendeleo ya Awali ya Mtoto
ya Miaka mitano kwa kushirikiana na wadau mbalimbali,kwa hiyo leo
tumewakutanisha wadau hawa tuweze kuwapitisha katika Mwongozo wa PJT-MMMAM nao
waielewe na hatimaye waweze kufikisha elimu hii katika jamii kila mmoja kwa
nafasi yake.”amesema Mukama
Wakizungumza katika kikao kazi hicho viongozi wa
dini wamesema,Progframu hiyo imekuja kwa wakati muafaka na wao kama viongozi wa
dini watatuia nafasi zao kuhakikisha elimu inafika kwa jamii ambayo ni waumini
wao.
Kuhani Raha Halisi wa Kanisa halisi la Mungu Baba
la wilayani Kondoa amesema,kwa kutumia nafasi zao watahakikisha ujumbe wa
Malezi ,Makuzi na Maendeleo ya Mtoto unafika kwa waumini kupitia nyumba zao za
ibada.
“Sisi viongozi wa Dini tuna watu wengi na
tunaaminika,kwa hiyo hili jambo limekuja kwa wakati muafaka na sisi
tutahakikisha tunashirikiana na Serikali katika utekelezaji wa suala hili ili
watoto wapate malezi ambayo yatawafanya wakue vyema na baadaye kuleta tija
katika Taifa.”amesema Kuhani huyo
Afisa Ustawi wa Jamii Elizabeth Shoo kutoka wilaya
ya Kondoa amesema,wakati wa utekelezaji wa Programu hiyo utakidhi haja na
kurejesha msingi wa malezi na makuzi ya watoto.
“Siku hizi na huu utandawazi uliopo kila mtu
amekuwa ‘busy’ wazazi wamejisahau jukumu lao la malezi wameliacha kwa wasichana
wa kazi,u-busy wa kutafuta pesa umefanya wazazi hawajui hata kuhusu ulinzi na
usalama wa watoto wao,lakini kwa ujio wa Programu hii sasa wazazi watakwenda
kuamka na kulea watoto kwa kufuata misingi iliyowekwa na kuwawezesha kukua kwa
utimilifu wao.”amesema Shoo
Dkt.Mganga :Unywaji maziwa shuleni uanzie kwa wanafunzi wa darasa la awali kwani ndiyo wapo katika hatua za ukuaji
 |
| KATIBU Tawala wa Mkoa wa Dodoma Dkt.Fatma Mganga akizungumza na wadau wa Maziwa nchini katika kongamano la wadau wa maziwa lililofanyika jijini Dodoma |
 |
| BAADHI ya wadau wa Maziwa |
 |
| WADAU wa Maziwa wakifautilia jambo kwenye kongamano la wadau wa maziwa lililofanyikaleo jijini Dodoma |
NA JOYCE KASIKI,DODOMA
KATIBU Tawala wa mkoa wa Dodoma Fatma Mganga
amewataka viongozi wa mkoa wa Dodoma kuhakikisha wanatafakari namna ya kuanza
kunywesha maziwa shuleni angalau kwa watoto wa darasa la awali hadi darasa la
nne ili waweze kupata lishe na kukua vizuri.
Mbali na hilo Halmashauri zinaweza kutumia fedha kiasi
cha shilingi 1000 kinachotengwa kwa ajili ya lishe shuleni kwa kila mtoto kwa ajili ya kununua maziwa na kuwapa
watoto ili waweze kuboresha afya zao badala ya kuzitumia katika masuala ambayo
hayana tija kwa afya za watoto hao.
Dkt.Mganga maeysema hayo leo jijini hapa wakati
akifungua kongamano la wadau wa maziwa ikiwa ni siku moja kabla ya kuadhimisha
siku ya unywajimaziwa shuleni.
Amesema inawezekana idadi ya wanafunzi wa shule
zote za msingi na sekondari wakawa wengi na hivyo kufanya mkoa kushindwa kumudu
gharama ya shughuli hiyo.
Kwa mujibu wa kiongozi huyo malengo yatakayowekwa
na wadau wa kongaman hilo yatauhusu mkoa wa Dodoma ambao umekuwa ukikabiliwa na
changamoto ya udumavu ambayo huenda pia inasababishwa na watoto kukosa kunywa
maziwa.
“Malengo hayo
yatatufanya tukimbie ,na kwa mkoa wa Dodoma
mimi hayo malengo yatakuwa yananihusu sana,maana huwa tuna masuala ya lishe, hapa
tuna fedha ambazo halmashauri wanaambiwa watenge fedha za lishe angalau kila
mtoto shilingi 1000 ,
“Sasa nikawa nasema, kumbe hata hizi fedha kiasi
fulani tunaweza kukitumia kwa kununua maziwa wakanywa watoto shuleni kwa sababu
hiyo pia ni lishe ,lakini pia na sheria imeshatengenezwa kwamba shilingi 1000
hiyo isitumike kwenye masuala tu ya
kwenda kuangalia kitu fulani kuhusiana na masuala ya lishe ,au unakuta imetumika kwenye ‘supervision’
,kumbe ingetumika kununua maziwa watoto wangeboresha afya zao .”amesema na
kuongeza kuwa
“Hata kama shule hatuwezi kunywesha watoto wote
basi inyweshe kuanzia angalau chekechea’darasa la awali’ hadi darasa la tatu ,au
la nne ,kwa mfano hapa Dodoma tuna
watoto kama laki tisa hivi ..,watoto wa sekondarti
kama laki tatu na laki sita ni shule za msingi,lakini
tukiangalia inawezekana laki sita ukawa mzigo mkubwa sasa labda tuchukue darasa
la awali hadi darasa la tatu au la nne
ambao wapo kwenye umri wa kuendelea kukua, amesema na kuongeza kuwa
“Hivi unaweza kufikiria mtoto wa chekechea kinatakiwa
kiwahi mwisho wasiku mtoto anakuja shule ana njaa,hakuna uji wala chakula
chochote ,mtoto anaanza kuchukia shule tangu akiwa darasa la awali ,sasa ili
watoto hawa wadogo waweze kupenda shule na kusoma ni kaunzisha miakati ya
kunywa maziwa hasa kwa watoto wadogo wa darasa la awali mpaka darasa la nne.”amesema
na kuongeza kuwa
“Tunaposema udumavu, ni ukuaji wa mtoto unakua umeathirika
sasa tukishakuwa na watu ambao hawakui vizuri sijui hilo linakwenda kuwa ni
Taifa la aina gani maana yake ukuaji ni pamoja na ukuaji wa ubongo kama ubongo haujaukua vizuri huyu mtu atakuwa
na mikakati kweli yakuendeleza nchi ,anaweza kuwa na mikakati ya kuboresha
uchumi?,haiwezekani sasa haya mambo ni ya msingi sana na tusilichukulie kama
suala la kawaida.
Ameomba kongamano litoke na mikakati ambayo ndiyo
itakuwa faida kwa wadau hao kufanya kongamano katika mkoa wa Dodoma na sisi
watendaji tupate kitu cha kusmmamia na kuonyesha katika kongamano la mwaka
ujao,tunaweza kualikwa tukatoa taarifa kwamba tumefanya hivi na hapo ndipo
dhamira ya kweli itakapotimia .
Mwenyekiti wa Bodi ya Maziwa Nchini Zacharia
Masanjiwa amesema,bado kuna changamto ya unywaji maziwa hapa nchini huku
akisema,licha yakuwa Tanzania ni nchi ya pili kwa kuwa na mifugo mingi katika
Bara la Afrika lakini bado kuna changamoto ya unywaji maziwa ambapo mtu mmoja
hunywa maziwa lita 62 badala ya lita 200 kwa mwaka.
“Lakini hata hivyo kwatakwimu hizo inawezekana
wanaokunywa maziwa mengi ni watu wazima sasa tunataka tulenge kwa watoto katika
kuhakikisha wanakunywa maziwa shuleni.”
Kwa upande wake Msajii wa Bodi ya Maziwa nchini
George Msalya amesema,wadau lazima sasa waanze kutekeleza suala la unywaji
maziwa shuleni kwa vitendo na siyo kuendelea kufanya kwa mazoea.
Wanachama zaidi ya milioni 2 wajitokeza kuwania nafasi ,NEC yaongeza muda wa kuchukua fomu ngazi ya mkoa na NEC Taifa
 |
| KATIBU wa Halamshauri Kuu ya Chama Cha Mapinduzi,Itikadi na Uenezi Shaka Hamdu Shaka |
 |
| Wajumbe wa Halamshauri Kuu ya Chama cha Mapinduzi (NEC) jijini Dodoma ukumbi wa White House wakiwa katika kikao cha uteuzi wa wagombea ngazi ya wilaya |
NA JOYCE KASIKI,DODOMA
KATIBU wa Halmashauri Kuu ya Chama Cha Mapinduzi ,Itikadi
na Uenezi Shaka Hamdu Shaka amesema kuwa watu zaidi ya milioni mbili
wamejitokeza kuwania nafasi mbalimbali za uongozi ndani ya chama hicho kuanzia
ngazi ya mashina hadi Taifa.
Aidha Shaka amesema kuwa chama hicho kimeongeza
muda wa kuchukua na kurudisha fomu za kuwania nafasi ya Halamshauri Kuu ya CCM
Taifa (NEC) huku kionya wanaokiuka taratibu za chama hicho.
Akizungumza mara baada ya kuhitimishwa kwa vikao
vya juu vya chama hicho chini ya Mwenyekiti wa CCM Taifa Samia Suluhu Hassan jijini
Dodoma vilivyoketi kwa ajili ya kufanya teuzi za wagombea wa nafasi za ngazi ya
wilaya Shaka amesema,kwa watakaokiuka taratibu hatua zitakazochukuliwa ni
pamoja na kufuta chaguzi husika.
“Kamati Kuu ya CCM Taifa imeongeza muda wa kuchukua
na kurejesha kwa hiyo kuanzia tarehe moja hadi tarehe tatu,zoezi la kuchukua na
kurejesha fomu kwa ngazi za mikoa na Taifa zoezi hilo litafanyika ,
“Kufunguliwa kwa dirisha hilo tutapata viongozi
wengi zaidi ambao wanaingia kwenye ushindani hatimaye tuwekuwapata wale
watakaowakilisha ngazi ya Taifa na ngazi ya mkoa.”amesema na kuongeza kuwa
“Eneo moja tutakalosimamia kwa nguvu zote ni eneo
la matumizi mabaya ya madaraka kwa maana kwamba kutumia rushwa ili kuweza
kupata madaraka ya uongozi ,hii ni kuhakikisha tunapata viongozi bora na siyo
bora viongozi.”
Aidha amesema hatua ya wanachaa zaidi ya milioni
mbili kuwania nafasi mbalimbali ndani ya chama hicho inaonyesha jinsi ambavyo
chama hicho kina watu wengi na wenye sifa za uongozi.
Shaka amesema,Halmashauri Kuu ya CCM Taifa pamoja
na mambo mengine imefanya uteuzi wa mwisho wa nafasi za wagombea wangazi za
wilaya nchi nzima.
“Kwa hiyo tumeteua na tumeshapata wagombea ambao
watakwenda kusimama kwenye uchaguzi wa ngazi ya wilaya ambao utafanyika Oktoba
Mosi na mbili mwaka huu nchi nzima”amesema Shaka
Amewataka wanachama wote wenye sifa ya kushiriki kuwachagua viongozi hao wa wilaya wajitokeze kwa wingi katika maeneo yao katika tarehe hizo kwa mujibu wa ratiba ambazo zitapangwa na mkoa na ngazi ya wilaya.
Wanufaika 640 wa Samia scholarship kugharimu sh.3 bilioni
 |
| Waziri wa Elimu,Sayansi na Teknlojia Profesa Adolf Mkenda |
NA JOYCE KASIKI,DODOMA
Wadau waaswa kushirikiana na Serikali katika utekelezaji wa PJT-MMMAM
 |
| MKURUGENZI wa Mtandao wa Malezi na Makuzi ya Watoto ( TECDEN) akiwa katika hafla ya uzinduzi wa PJT-MMMAM ngazi ya mkoa (mkoa wa Dodoma) |
 |
| MKURUGENZI wa Shirika liliso la Kiserikali Action for Community Care (ACC) linalotekeleza mradi wa toto Kwanza Pendo Maiseli |
 |
| BAADHI ya wadau wakiwa katika hafla ya uzinduzi wa Programu Jumuishi ya Taifa ya Malezi,Makuzi na Maendeleo ya Awali ya Mtoto (MMMAM) mkoa wa Dodoma. |
NA JOYCE KASIKI,DODOMA
MKURUGENZI wa Mtandao wa Malezi na Makuzi ya Watoto
nchini (TECDEN) Mwajuma Rwebangila amewaasa wadau wa mashirika yasiyokuwa ya
kiserikali wenye malengo ya watoto washirikiane na Serikali kuhakikisha
Programu Jumuishi ya Taifa ya Malezi,Makuzi na Maendeleo ya Awali ya Mtoto (PJT-MMMAM) itakayowezesha watoto kulelewa na
kufikia utimilifu wao.
Akizungumza na waandishi wa habari mara baada ya
uzinduzi wa Programu hiyo kwa ngazi ya mkoa,Mkurugenzi huyo amesema,wadau wana kila sabahu ya kuelimisha jamii umuhimu
wa kuwekeza kwa watoto wadogo .
“Kuwekeza kwa watoto wadogo ni muhimu
sana,inawezekana Taifa tunalolieona sasa hivi lina mwanzo wake ,na tunaamini
kwamba ukibadilisha mwanzo wa hadithi ,umebadilisha hadithi nzima,
“Kwa hiyo tubadilishe mwanzo wa hadithi toka mimba
inatungwa mtoto alelewe katika kuhakikisha anakuwa na afya bora,lishe ya
kutosha,ulinzi na usalama wa mtoto,Malezi yenye mwitikio na fursa za ujifunzaji
wa awali.”amesema Rwebangila na kuongeza kuwa
“Watoto wapewe fursa za kucheza ,na kwa kucheza mtoto
anajifunza vitu mbalimbali,anaweza kutengeneza kitu na ukimwambia akuelezee
atafanya hivyo,hiyo inatosha kufanya akili na ubongo wake kufanya kazi kwa
haraka.”
Kwa mujibu wa Rwebangila TECDEN wanashirikiana na Umoja wa Klabu za
waandishi wa habari nchini (UTPC) kupitia Shirika lisilo la kiserikali
linaoshughulika na masuala ya Malezi na Makuzi ya Watoto (CiC) linalotekeleza
mradi wa miaka mitatu wa Mtoto kwanza.
Rwebangila amesema,mradi huo umelenga kuchochea utekelezaji
wa PJT-MMMAM katika kuhamasisha sekretarieti za mikoa kuhakikisha Programu hiyo
kubwa ya Taifa inafahamika na itekelezwa katika ngazi za Mikoa na Halmashauri.
Naye Meneja Programu Mradi wa Mtoto kwanza unatekelezwa
mkoani Dodoma na Shirika lisilo la
Kiserikali la Action For Community Care (ACC) Magret Mukama amesema,mradi huo
umejikita kusaidia watoto walio na umri wa miaka 0-8 ili kuharakisha
upatikanaji wa matokeo chanya ya Maendeleo ya Awali ya Mtoto katika utoaji wa
huduma za malezi jumuishi .
“Maana
wataalam wanasema katika kipindi hicho mtoto ubongo wa mtoto unakua kwa kasi na mtoto anakuwa na
uwezo wa kujifunza na kuelewa kwa haraka ,ndiyo maana mradi umejikita katika
kusaidia kundi la watoto hao kwa ajili kuwa na Taifa lenye tija kwa Taifa hapo
baadaye.”alisema Mukama
Naye Afisa Maendeleo ya Jamii kutoka Wizara ya
Maendeleo ya Jamii,Jinsia ,Wanawake na Makundi Maalum Salome Francis amesema, mpaka sasa Programu imeziduliwa kwenye Mikoa tisa
ya Tabora, Morogoro,Lindi, Arusha,
Manyara, Mbeya, Rukwa, Kagera na Dar Es Salaam huku Dodoma ukiwa mkoa wa 10
Kuzindua programu hiyo.
Aidha amesema, baada ya
uzinduzi huo wataalam kutoka kada mablimbali za Maendeleo ya Jamii, Ustawi wa
Jamii, Afya, Lishe, Elimu, na Mipango Pamoja na Asasi za Kiraia kutoka
Halmashauri zote za Mkoa wa Dodoma watajengewa
uelewa kuhusu PJT-MMMAM na baadae kuandaa mpango kazi wa utekelezaji wa kipindi
cha mwaka mmoja kwa kila Wilaya ambao utasaidia katika kupima utekelezaji wa
Programu.
