RC Senyamule ahimiza wadau kushiriki kwa dhati katika uitekelezaji wa PJT-MMMAM

MKUU wa mkoa wa Dodoma Rosemary Senyamule (katikati)akionyesha Muongozo wa Programu Jumuishi ya Taifa ya Malezi,Makuzi na Maendeleo ya Awali ya Mtoto PJT-MMMAM ,baada ya kuizindua Prograu hiyo katika ngazi ya mkoa.

Wadau ambao ni mashirika yasiyo ya kiserikali mkoani Dodoma wakimsikiliza Mkuu wa mkoa Rosemary Senyamule katika Mkutano wa Uzinduzi wa Programu Jumuishi ya Taifa (PJT-MMMAM) ngazi ya mkoa.

KATIBU Tawala wa Mkoa wa Dodoma Dkt.Fatma Mganga akizungumza na wadau kuhusu Uzinduzi wa Programu Jumuishi ya Taifa ya MAlezi,Makuzi na Maendeleo ya Awali ya Mtoto PJT-MMMAM ngazi ya mkoa.

 

NA JOYCE KASIKI,DODOMA

 

MKOA wa Dodoma umezindua Programu ya Taifa ya Malezi,Makuzi na Maendeleo ya Awali ya Mtoto PJT-MMMAM huku mkuu wa mkoa huo Rosemary Senyamule akiwataka wadau wa mashirika yasiyokuwa ya kiserikali kushiriki kwa dhati kutekeleza Programu hiyo iliyolenga Taifa kuwa na watu wenye tija.

Kwa mujibu wa muongozo wa PJT-MMMAM ,ushahidi wa kisayansi unatabiri upo uwezekano wa kudi la watoto wenye mwanzo duni kupoteza takribani robo ya mapato ya baadaye endapo hawatakuwa na mwanzo mzuri kuwezesha kufikia hatua timilifu za ukuaji.

Akizindua Programu hiyo Senyamule amesema,huu ni wakati muafaka kwa jamii kujikita katika malezi ,makuzi na maendeleo ya awali ya mtoto kwani ni eneo ambalo litaleta mabadiliko kwa watanzania na hatimaye kupata Taifa lenye tija kwa kuwa na watu wenye uwezo wa kufikiri mambo na kufanya maamuzi sahihi.

Amesema,maeneo muhimu ya kuzingatiwa kwenye malezi hayo ni pamoja na Afya bora,lishe ya kutosha,ulinzi na usalama wa mtoto ,malezi yenye mwitikio na fursa za ujifunzaji wa awali.

“Haya ni maeneo ambayo yakifuatwa katika kumlea mtoto atajengeka kitabia na kukuza uwezo wake wa kufikiri mambo ,kwa mfano eneo la lishe ..,mtoto asipopata lishe ya kutosha  katika siku 1000 za mwanzo ,haimtasaidia pindi atakapokuwa mtu mzima

“Hata katika eneo la malezi,mtoto anapaswa apate malezi kutoka kwa wazazi badala ya watoto kulelewa na wasichana wa kazi ,wazazi wamekuwa bize na shughuli za kiuchumi huku watoto wakiachiwa dada wa kazi ,hii inahatarisha hata katika suala la ulinzi na usalama wa watoto.”amesema Senyamule 

Awali Katibu Tawala wa Mkoa wa Dodoma Dkt.Fatma Mganga amesema,wadau waipokee programu hiyo mpya na waifanyie kazi ili iwanufaishe watoto wa mkoa wa Dodoma na Taifa kwa ujumla.

Afisa Maendeleo ya Jamii,Wizara ya Maendeleo ya Jamii,Jinsia,Wanawake na Makundi Maalum Salome Francis amesema kwa upande wa Mikoa mpaka sasa Programu imeziduliwa kwenye Mikoa 10 ya Tabora, Morogoro,Lindi, Arusha, Manyara, Mbeya, Rukwa, Kagera na Dar Es Salaam na  Mkoa wa Dodoma.
Salome amesema,Programu hiyo  inatekelezwa kwa kipindi cha miaka mitano kuanzia mwaka 2021/22-2025/26 na inalenga kuwekeza moja kwa moja kwenye Malezi, Makuzi na maendeleo ya Watoto wa umri wa miaka 0-8 ili kuharakisha
upatikanaji wa matokeo chanya ya Maendeleo ya Awali ya Mtoto katika utoaji wa huduma za malezi jumuishi .

Programu ya PJT-MMMAM ,tayari ilishazinduliwa kwa ngazi ya Taifa Desemba mwaka jana na Rais Samia Suluhu Hassan jijini Dodoma aliyewakilishwa na Waziri wa Maendeleo ya JamiiJinsia,Wanawake na Makundi Maalum Dkt.Dorothy Gwajima. 

 

Share: